La khyllie paidbah ka Jaintia Hills Development Society iaka iew ki nongrep ha Mihmyntdu

Syllad | The Rising MeghalayaMarch 9, 2022

Ka Jaintia Hills Development Society (JHDS) kala khyllie paidbah iaka Farmer’s Marketing Centre ne ka iew ki nongrep ha Mihmyntdu West Jaintia Hills haka sngi Balang.

ka JHDS kala shim ia kane ka sienjam ban plie ia kane ka iew nongrep kynthup iaki nongthain nongthaw, ki nongshna jingbam bad kiwei kiwei ha rilum Jaintia ban iarap iaki nongrep ban pyniaid iaki mar jong ki ha shi jaka.

La khyllie ia kane ka iew da u kongsan u Additional Deputy Commissioner ka West Jaintia Hills u Bah Alexander Mukhim ha ryngkat ka jingïadonlang ka symbud kongsan ka Kong B. Blah Block Development Officer Thadlaskeiñ Block.

Ïa kane ka center la bei bad pynlut pynsep da ka Jaintia Hills Development Society bad yn sa pynïaid da ki katto katne ki SHG kiba la jied kyrpang.

U Director ka Jaintia Hills Development Society u phadar Manbha Pakem haka jingkren ula ong ka seng ka la don ka jingthmu ban plie ïa kane la kham slem hynrei na kadaw jong ka khlam la pynsahngeh shuwa shi por bad u la ong ruh ba ïa kane ka center la kyrshan lang ruh da ka Caritas India bad ka Misereor Germany kiba long ki Agency kiba trei na ka bynta ka bha ka miat ki nongrep.

Shuh shuh ula ong ruh ba ka jingthmu ban plie ïa kane ka center ka long ban ïarap ïa ki nongrep ha ka ban pyni nam bad pynïaid iew ïa ki tiar bad ki marbam ba la pynmih da ki nongrep jong ka thaiñ Jaintia baroh kawei.

Kane ka center kan pynsuk ruh ïa ki nongthied kiba napoh bad nabar ba kin ïoh ïa ki tiar ba kordor bad babha bala pynmih da ki nongrep jong ka rilum Jaintia.

U Addl. Deputy Commissioner u Bah Alexander Mukhim u la ai ka jingiaroh ïa ka Jaintia Hills Development Society kaba la shim ïa kane ka sienjam ban kyntiew ïa ka ïoh ka kot ki nongrep ka thaiñ. U la ong ruh ba kane ka center kan ïarap ban pynsting ïa ki jingeh jong kiba bun ki nongrep.

U la kyntu ruh ia ki ophis sorkar bapher bapher bad kumjuh ruh ïa ki SHGs ban kin ïatreilang bad kane ka seng khnang ban wanrah ia ka roi ka par ym ban don ka jingiaknieh (Competition) iwei ia iwei.

Ha kane ka sngi la ïadonlang ruh katto katne ki ophisar ka tnat sorkar kiba kynthup ïa u Senior Scientist ka KVK Jowai u Bah D. Paswet, u District Project Manager ka Basin Development u Bah Shiwel Lyngdoh, u Asst. General Manager ka NABARD u Bah Grevile Kharlukhi, u Assistant Director ka Agriculture u Bah Marbiang Lamare, u Subject Matter Specialist ka KVK Jowai u Dr. Rimiki Suchiang, president Society for Urban and Rural Empowerment (SURE) u Dr. H.H Mohrmen bad u Bah Lambormi Suchen uba long u Skill Development Officer ka West Jaintia Hills.

Ha kane ka sngi la don ruh ka jingai burom ïa ka Kong Sakhilang Lamare kaba dei kawei napdeng ki longkmie ba la wan shakhmat ha ka liang jinglah ban pynmih shibun ki mar-rep ba kynsai bad kaba long ruh ha kajuh ka por ka Secretary jong ka Village Organisation kaba la kiew bha ha ka liang ka jingshim ram na ki bank lynba ki Self Help Group.

La sam ruh ha kane ka sngi ïa kawei ka kor shet jingbam sha ka SHISUR Self Help Group ba la ai sngewbha da ka Jaintia Hills Development Society khnang ba kin lah ban pyndonkam ha ka ban shna jingbam lyngba u Krai katkum ki jingdonkam ka juk ba mynta.