La kylla mulot ka madan MFA Third Ground Polo, shano yn ïalehkai ïaka football?

Syllad | The Rising MeghalayaJune 21, 2022

Ka 19 tarik u Risaw u snem 2011, dei u snem ba kum ka jylla kaba u paidbah uba ieit bad ba sngewtynnad ia ka football, u la ioh pat ban pdiang sngewbha ia kawei ka madan ialehkai football kaba paka bad ba iadei bha bad ka jinglong jingman ka suin bneng ha kane ka jaka, katta ka madan Artificial Turf.

Ka jinglah ban ioh ia kum kane ka madan kaba siang da u phlang plastic, ka dei ba ha kum kane ka snem, ka Fifa, ka la wan shakhmat ba kan bhah kyrpang ia kum kane ka madan  hangne ha ka nongbah Shillong ha ka nongrim jingpyntrei kam ka jong ka ia ka “Win in India with India”.

Hynrei mynta hadien 11 tylli ki snem, ki dak ki shin kumba ki mih paw hi ka long, ba kane ka madan mynta ka la jot rathai bad ha ka por ba jur bha lei lei u slap, ka um ka lang la kum ba lang ha ka pung bad ka bam por bha ia kita ki nur um ba la shna kyrpang (drainage) ba kin kjit sak sak.

Ia ka jingjot  bad sniew noh jong kane ka madan, la sakhi ia ka mynta ka sngi ha ka kylla iakhun kaba ar ne ka Round 2 jong ka Shillong Premier League, ba la iakhun hapdeng ka Shillong Lajong FC pyrshah ia ka Mawlai SC, ha kaba u lapbah ka aiom lyiur, u la wan ban ther tyngeh ha ka por nohphai sngi, katta ha shwa ban sdang ka kylla miet, bad tang hapoh 17 minit ba la pynialehkai, naka liang u Referee lem bad ki Linesman ba la pyniaid ia kane ka jingiakhun haba ki lap bad shem ia kane ka jingsdang ban lang um ka madan, ki la rai ban pynsangeh noh shi syundon ia kane ka jingialehkai.

Kum ka jylla, kaba ka football ka dei ka Number One Sports, lehse arsnem ka jinglah ban pynlong biang ia ka football, kaba jia long hadien ka jingwan ban lyngshop ka jingpang iabit Covid 19, ka Shillong Premier League lehse ka dei kawei na ki jait jingiakob ialehkai, kaba ym tang ka khring ia ka khmat u paidbah nongwan peitkai, pynban ka da pynkmen ruh dik dik ia ka mynsiem jong ki rang ialehkai jong baroh 8 tylli ki klob.

Phewse, marsein ia sdang jong kane ka lympung bad ka jingjia kaba la mih paw hynne ka sngi, kam lah ban khlem da theh umpjah ne ban pynjew ia ka mynsiem jong baroh, namar lait na kane ka madan, ha nongbah Shillong hi kumba ka long ia mynta ym don madan shuh ban lah ban pynialehkai ia ki lympung bah ialehikai football kiba kum ka Shillong Premier League.

Ka jinglied noh noh ia u u artificial turf ha JN Stadium Polo, namar ba ka sorkar jylla ka la iaid shakhmat ia ka kam ban pynbha bad ban siang thymmai da u phlang (natural turf) ka jingbym patlah ban bhah pisa da ka sorkar ban siang da u artificial turf ia ka madan First Ground ka Shillong Sports Stadium, ha madan Polo, kumba la dep ban kular  bad ka jingjia ba hynne ka nohphai sngi, ka pyndukha mynsiem bha ia u paidbah ba ieit bad ba sngewtynnad ia ka football, katno tam lei lei ia ki trai jong ki kynhun ba iashim bynta, ki coach bad khamtam lei lei ia ki player kiba ialehkai.

Ha kaba sdang ka kylla ialehkai ba nyngkong jong ka SPL, la lap bad iohi ruh ba ka MFA Turf Third Ground Polo, ka long kaba ima ban pynialehkai, namar u phlang plastic u la khoi, nangta ki jri kiba ni (rubber) ki la mih bad tuid lut shabar ka madan ialehkai, kaba kren shai kdar ba lada jia ba sniew ka bok, ka lah ban wanrah ia ka jingmynsaw kaba shyrkhei ia ki player ba ialehkai ha kane ka madan.

Khyndiat hap ban wad pat ruh ia ka daw ba aiu sha ha lyndet, ba 11 snem ba kane ka madan kan sniew noh, hato ki bor ba dei khmih ka Meghalaya Football Association (MFA) ki la leh aiu naka bynta ban pynneh ne ban pynbha ia kane ka madan, ne ki paidbah ruh khamtam lei lei kito kiba la pyndonkam bha khah khah ia kane ka madan, laki la sngewthuh lem ia ka jing kordor ban tyngkai ia kae ka madan, shano jah ka pisa kaba juh shim na ki klob ne ki kynhun jong ki briew kiba juh siew ia ka bai wai ban ialehkai ha kane ka madan.

Hynrei ban kdew kti ne ban kynnoh ka por ka la dier, ha kaba ki nongkitkam ba mynta ka MFA kin hap ban thaw ia ka lad la ban pynbha noh shwa shi syndon ia kane ka madan ne ban wad lad wad lynti ban khreh siang thymmai noh ia ka da uwei pat u artificial turf.

Kumta haba shem bad iohi ia kum kane ka jingjia, lehse kiwei pat ki district ne ki synjuk ialehkai ka jylla ba la don ia kum kane ka madan, kin hap ban shim khia ba da lei lei ymlah ban pyndonkam pathar ia kum kine ki jait madan, ne lada pyndonkam ruh, dei ban da hap ban iaid lang ryngkat bad ki jingbthah da kumta ki madan ha ki jaka ki jong ki, kin nym kloi ban lap ba kylla mulot noh kumba la long mynta ka MFA Turf 3rd Ground, Polo.