La kynriah noh ia ka shlem ai jinghikai ka Shillong Cricket Academy sha madan ka DS Lawsohtun

Syllad | The Rising MeghalayaMarch 19, 2022

Shiphew snem hadien ba la seng ia ka, na ka liang ki bor pyniaid jong ka Shillong Cricket Academy ne SCA ki la shim ia ka sien jam ban kynriah noh ia kane ka shlem ai jinghikai ka jong ki na kut ka madan ialehkai kriket jong ka JN Stadium, Polo sha ka madan ialehkai ba thymmai jong ka dorbar shnong Lawsohtun ba don ha ka Block VI. Ka jinglah ban seng ia kane ka shlem ai jinghikai ha kane ka jaka ka dei lyngba ka sokular (agreement) kaba la soi ha ka 17 tarik u bnai Ïaiong u snem 2021.

Ka jinghap ban kynriah noh ia ka jaka ai jinghikai jong ka SCA ka jia long ba hadien ba ka jylla Meghalaya la pdiang bad ioh jingithuh ia ka da ka BCCI bad ka jingioh ban aireng ha ka lympung ialehkai kriket ba heh jong ki jylla ha ka ri ka Ranji Trophy, ka madan ialehkai kriket mynta ha JN Stadium hadien ba la pynbha ia ka madan  ka jong ka, la sngewthuh ba da lei lei yn nym lah shuh ban shu pyndonkam pathar ia ka lait noh tang ia kino kino ki jait jingialehkai jong ka MCA bad ki jong ka BCCI.

Haba iadei bad ka jingkynriah noh iua kane ka shlem ai jinghikai, mynta ka sngi ka 19 trik Lber 2022, ka la don syndon da ka jingialang ban plie paidbah ia kane ka shlem ai jinghikai, ia kaba la pynlong ia ka da ka dorbar shnong jong ka Lawsohtun bad ba la wan ban sakhi bad don ryngkat lang u MLA u ba dei artad u Myntri  jong ka sorkar jylla u bah Hamletson Dohling, u Rangbah shnong, ki dkhot nongkitkam ka jong ka Lawsohtun Sports Club, u Naba Bhattacharjee ba dei u convenor jong ka task force ka BCCI ha North East,  ki nongkit kam ka Shillong Cricket Academy, ki nonghikai (coaches) ki khynnah ba ialehkai bad kumjuh ki kmie ki kpa jong ki khynnah.

Ha ka jingkren kum u kongsan,u bah Hamletson Dohling u la ong ba kane ka sngi kam dei ba ka long kyrpang tang ia ka SCA, pynban  wat ia ka constituency ka jong u, hadien ba ka SCA ka ka wan shakhmat ban seng ia kane ka shlem ai jinghikai ha kane ka jaka, da kumta u bah Hamletson u sngew ban ai khublei kyrpang ia ki nongpyniaid kane ka shlem ai jinghikai, halor ka jingkloi ka jong ki ban wan ban seng syndon da kane ka shlem ai jinghikai hangne hapoh ka shnong ba hap ha ka constituency ka jong u.

U Bah Hamletson um lah ban khlem da ai khublei ia ki dkhot nongkit kam ka dorbar shnong bad kumjuh jong ka sport club ka Lawsohtun, kiba long kiba iohi jngai bad ba da shim khia shisha na ka liang ka jong ki ban pdiang syndon ia ka jingtyrwa na ka liang ka SCA ban shah ia ki ban seng ia kane ka shlem ai jinghikai ha kane ka jaka, kaba da kylla ka kren shai kdar ba da kumno ba ka dorbar shnong bad kumjuh ka sports club ka Lawsohtun ki thrang ban sliang ban kyntiew ia ka kam ialehkai khamtam ia ka kriket hangne hapoh ka jylla Meghalaya.

Haba ai jingkren lang ha kane ka jingialang u Rangbah shnong ka Lawsohtun u bah Hariberth Rynjah, ha kaba nyngkong eh u sngew ban pdiang sngewbha ia ki khynnah rit bad ia ki kmie ki kpa ki jong ki kiba la rung ialade sha kane ka sshlem ai jinghikai jong ka SCA kaba naduh mynta ka sngi, ka jingbteng ban ai jinghikai kan dei noh ha kane ka jaka ba thymmai.

U bah Rynjah u la wan shakhmat ban pynpaw ia baroh ba haba iadei bad ka jinglong jingman ha ka shnong, u la kren shai kdar ba ym donkam satia ban khuslai wat nym tieng haba leit sha kane ka shnong namar u kam ba ka dei ka shnong kaba don hapdeng ka jingsuk bad long artad kaba shngain, nalor katta ia ki sawdong ki sawkun ba ker tawiar ia kane ka shnong dei da ki jaka, ki wahduid bad ki khlaw ba khuid ba suba.

U Bah Rynjah u kyrmen ba da ka jingwan ban seng ia kane ka shlem ha kane ka jaka ka shnong ka jong u, u ngeit skhem ba un sa ioh ia kiba bun bah ki jingmyntoi hapoh ka shnong, da kaba u kyntu ruh ia ki kmie ki kpa jong ki khynnah ka shnong Lawsohtun ba kin shim ia kane ka kabu ban phah ia la ki khun jong ki ban pynrung kyrteng ialade sha kane ka shlem ai jinghikai.

Haba ai ia ka jingkren maitphang ha kane ka jingialang u Director ka SCA u bah Gideon Kharkongor, u ong ba hadien shiphew snem ba la seng ia kane ka shlem ai jinghikai, la lah ban sei ruh ia ki nongialehkai ba kynsai naka bynta ka jylla ha ka kyrdan iakhun jong ka U-16 kaba long ka jingsarong ia ka SCA hi baroh kawei.

Pynban ha kine ki shiphew snem jong ka jingiaid lynti, kum ki nongpyniaid kim shym la lah ban iald lait na ki jingeh kaba iai ban syrtap pa syrtap, kaba kawei na ki jingeh dei ia ka jingbym lah ban ioh pyndonkam tikna shuh ia ki jaka ban ia kilan.

Shwa ban kynriah ia kane ka shlem ai jinghikai ha kane ka jaka, u bah Gideon, u iathuh ba ka SCA ka la pyrshang ban wad ha kiba bun tylli ki shnong ia kum kane ka jaka kum sha Lumpyungngad, ha Secondary School, pynban u bah  Gideon u ong ba ka SCA ka long kaba donbok ba ka dorbar shnong Lawsohtun, kaba hapoh shi snem jong ka jingiakren bad pynbeit, daka mynsiem kaba jynsur, ki la kloi ban pdiang ne ban ailad ia ka SCA ban shah ban pyndonkam ia ka, kaban iai sah pyrto junom.

Ha kane ka sngi na ka liang u Naba Bhattacharjee, u la wan shakhmat ba un noh synniang sha ka dobar shnong Lawsohtun, kum ka dak ka jingsdang ban pyntyllun shakhmat ia  kane ka shlem ai jinghikai.