La kyntiew kyrdan ia ka Raliang Police OP sha ka Police Station

Syllad | The Rising MeghalayaAugust 8, 2023

Ka jingdawa ka long kaba la slem, hynrei kala urlong mynta ka kynti haba Myntri ka tnat Civil Defence & Home Guards, u Ma Comingone Ymbon ula wan ban kyntiew kyrdan iaka Raliang Police Outpost sha ka Police Station haka sngi ba Ar.

Ha kane ka jingialang plie ia kane ka Raliang Police Station la iadonlang u Superintendent of Police West Jaintia Hills District Ma Chemphang Syrti, kiwei kiwei ki ophisar pulit ha ryngkat ki nongialam shnong bad ki riew rangbah jong ka thain.

U Ma Comingone uba long ruh u nongthaw aiñ ka Raliang, haba kren kum u kongsan ula pynpaw ba ula shimkhia shibun ban kyntu ia ka sorkar na ka bynta ban kyntiew kyrdan noh ia kane ka Out Post (OP), bad u la ong ruh ba kane ka jingkyntiew kyrdan kam dei satia namar ka jingkiew jong ki kam pyntriem hapoh ka thain, hynrei ka dei ka sienjam ban pyniajan ia kane ka tnat treikam bad ki paidbah nongshong shnong.

U la ong ruh ba kane ka sngi kan dei ka sngi sah kynmaw ha kaba ki nongshong shnong kim donkam shuh ban leit shaduh sha Jowai na ka bynta kino kino ki kam kiba iadei bad ki Police Station.

Nalor kata u la kdew ruh ba namar ka jaka ba la buh ia kane ka police station ka long kaba rit bad khapngiah, kumta u buh ka jingkyrpad ia ka dorbar shnong ba kan tuklar lem khnang ban pynioh ia ka jaka kaba kham heh na ka bynta kane ka police station.

Kumban shu pynkynmaw ha u 3 tarik Naiwieng 2022 ka sorkar MDA haka jingialam u Conrad K Sangma kum u Myntri Rangbah ka Jylla ula dep ruh ban buh ia u mawnongrim naka bynta ka Fire & Emergency Service Station, Raliang.