La palat 24 kynta dheng kali ha surok bah Shillong Jowai

Syllad | The Rising MeghalayaOctober 26, 2019

JOWAI: Ka jingdheng kali ha surok bah NH 6 Shillong Jowai kala ktah jur bha bad kala kynjoh palat 24 kynta haduh bala thoh ïa ka khubor.

Kane ka jingdheng kali kala sdang naduh ka 7 baje jong ka miet sngi Thohdieng hadien ba sniew lai tylli ki trok ha Ummulong bad ha Dong Wahrasi, Mookyndur.

Kane ka jingsniew kine ki trok kala wanrah ka jingsahkut ki kali hadien ka jingïaknieh ïoh shuwa ki kali ban ïaid naduh ki kali rit haduh ki kali heh kaba kynthup ïaki trok dewiong kiba hiar sha Assam.

Kane ka jingsahkut kali kala wanrah jingeh ïaki nongleit nongwan kiba wan na ki jaka ba jngai kum na lower Assam, Tripura, Manipur bad kiwei kiwei khamtam ïa kiba pang ba shitom.

Ki Pulit Ummulong naduh ka miet Thohdieng haduh ka Sngi Saitjaiñ kila pyrshang katba lah ban pynïaid ïa ki kali, hynrei namar ka jingbym lah ban pynkynriah ïa kitei ki trok bad ka jingjur ka jingïaknieh ïaid ki kali kala wanrah ka jingsahkut kali haduh mynta.

Baroh arliang ka surok kala sahkut ka leit ka wan ki kali naduh na Puriang, Wahmynso, Ummulong haduh Mukhla .