La plie ia ka DIKSHa Beauty Care Course bad Entrepreneurship Cell ha Jaintia Eastern College

Syllad | The Rising MeghalayaMarch 2, 2025

Da ka jingthmu ban pynkupbor ia ki samla pule lyngba ki sap ki phong bad ki jingtip kiba donkam na ka bynta ban pynrung ha ki ia ka mynsiem ha ka liang ka sengkam seng jam, ha ka 26 tarik Rymphang la plie iaka DIKSHa Beauty Care Course ha Jaintia Eastern College.

Ia kane ka course la kyrshan da Dalmia Bharat Foundation bad ka Entrepreneurship Cell hapoh ka jingkhmih jong ka PRIME Meghalaya. Ka MDC ka 23-Rymbai-Khliehriat ka Kong Violet Lyngdoh kala plie paidbah ia kane prokram ai jinghikai ha ka jingialang kaba la long hapoh Jaintia Eastern College (JEC), Khliehriat.

Ha kane ka sngi la iadonlang ruh ka Assistant Commissioner, East Jaintia Hills District, ka Kong. F. Wann, Principal Jaintia Eastern College, Dr. P. Nongtdu, Technical Head, Dalmia Cement (Bharat) Limited, Meghalaya, u Pramod Kumar, HR Head, Dalmia Cement (Bharat) Limited, Meghalaya, u Vinay Kumar Mishra, ki ophisar kiba mihkhmat na ka PRIME Meghalaya, ki nonghikai bad ki samla pule.

Ha ka jingkren plie, ka MDC ka thain ka la pyrto ia ka sienjam ba la shim da ka Jaintia Eastern College ban wanrah ia kum kine ki prokram ki ban iarap shibun ia ki samla pule ba kin lah ban pynpaw ia ki jingsngewtynnad ki jong ki bad ka ban pynlah ia ki ban kyntiew bad pynroi ia ka mynsiem ha ka liang ka sengkam seng jam.

Ka Kong Violet ka la pynpaw ruh ia ka jingkyrmen ba kane ka rynsan ym tang ba kan iarap ia ki samla pule ha ki lad ioh kam ioh jam, hynrei kan pynlah ruh ia ki ba kin thaw ia ki lad ai kam ai jam na ka bynta kiwei pat. Ka la kyntu ruh ia ki samla pule ban shim ia ka kabu da ka jingkmen bad ka jingaiti lut da kaba iai ban ruh ba ka jingjop barabor ka sdang na ka sienjam kaba rit.

Ka Assistant Commissioner, EJH ka Kong F. Wann ha ka jingkren ka la iaroh ia ki bor pyniaid jong ka college halor ki jingthmu ki jong ka bad halor ka jingpynleit jingmut ha kaba pynlong ia kum kine ki vocational training da kaba pynpaw ruh ia ka jingkyrmen ba kum kine ki prokram kin iarap shibun ia ki samla pule ba kin don ia ka jingangnud ban sengkam seng jam bad ka ban pynlah ia ki ba kin sdang ia ki kam ki jam ha ki sngi ki snem ki ban wan.

Katba u Pramod Kumar na ka Dalmia Cement ha ka jingkren u la pynpaw ba ka Dalmia Bharat Foundation ka don ia ka jingkut jingmut na ka bynta ban kyntiew ia ka roi ka par jong ka imlang sahlang bad ki trai shnong, ha kaba u la kyntu ruh ia ki samla pule ba kim dei khanglad ialade tang hapoh u pud u sam jong ka district hadien ba ki la pyndep ia ki jinghikai hynrei ruh ban pyniar ia ki jingtreikam sha kylleng ka jylla bad sha ki bynta jong ka ri.