La plie ia ka jaka pynroi symbai dohkha ba nyngkong lyngba ka MGNREGA ha Lahalein

Syllad | The Rising MeghalayaFebruary 10, 2024

Lehse kan long ka sngi sahkynmaw na ka bynta ka shnong Lahalein kaba don ha ka thain khappud ka India-Bangladesh hapoh East Jaintia Hills lyngba ka jinglah ban plie ia ka jaka ri bad pynroi symbai dohkha kaba nyngkong eh hapoh ka thain ha ka 9 tarik mynta u bnai.

Ia kane ka jaka pynroi symbai dohkha ba la shna bad pynbit pynbiang da ka VEC, Lahalein lyngba ka skhim MGNREGA bad Basin Development Unit (BDU), East Jaintia Hills District. La wan plie da ka MLA ka Sutnga -Saipung ka Kong Santa Mary Shylla kum ka Kongsan ha katei ka sngi.

Haba aijingkren kum ka Kongsan, ka Kong Santa Mary ka la pyrto ia ka ophis u Superintendent of Fisheries ka district kumjuh ia ki dkhot jong ka Lahalein VEC halor ki sienjam kiba ki la shim na ka bynta ban pyndep bad pynurlong ia kane ka jaka pynroi symbai dohkha kaba nyngkong eh hapoh ka thain.

Nalor kata ka la ai khublei kyrpang ruh ia u Bah L Tynsong uba dei u nongri dohkha jong ka thain uba la ai mynsiem bad pynshlur ia kiba bun kiwei pat lyngba kane ka jingpyrshang ka jong u ha ka kam ri dohkha, kata da kaba pynpaw ka jingkyrmen ba ki nongshong shnong jong kane ka jaka kin bud ia ki dienjat ki jong u bad ban pynthikna ba kane ka shnong kan kylla long ka jaka ba kongsan ha ka kam pynmih dohkha hapoh ka district.

Ka Kong Shylla ka la pynpaw ruh halor ka jingdonkam ia ka jingiashim bynta lang jong ki nongshong shnong khnang ban lah ban kyntiew shuh shuh ia ka kam ri dohkha bad ka ban lah ruh ban kyntiew ha ka liang ka ioh ka kot bad ka roi ka par.

Lyngba kane ka project ba la lamkhmat da u Superintendent ka Tnat Fisheries ka EJH, u Bah H. Kharbuki katkum ki kyndon ka NFDB. La khmih lynti ruh ba yn lah ban pynroi haduh kumba 1.5 haduh 2 million ki symbai dohkha man la u snem bad ka ban lah ruh ban kyntiew ia ka ioh ka kot ka ban kot sha kumba 3 haduh 4 klur ha ka shi snem.

U Deputy Commissioner ka EJH, u A Baranwal ha ka jingkren u la pynpaw ka jingsngewnguh ia u Superintendent ka Tnat Fisheries halor ka jingshim ia kane ka sienjam ka ban wanrah jingkylla ha ka liang ka ioh ka kot bad ka roi ka par da kaba pynpaw ruh ba kane kan plielad shibun ha ka liang ka ioh kam ioh jam hapdeng ki samla jong ka district.