La plie ïa u motdur jong U Tirot Sing Syiem ha Dhaka, Bangladesh

Syllad | The Rising MeghalayaFebruary 17, 2024

Ka Sorkar Jylla haka 16 tarik Rymphang kala plie ia u mot sahnam jong U Tirot Sing Syiem, u khlawait bad u nongialeh laitluid ha Indira Gandhi Cultural Centre ha Dhaka, Bangladesh.

U Tirot Sing Syiem  u long uwei napdeng ki Syiem Khasi ban ïakhun pyrshah iaka sorkar Britrish ha u snem 1829.

Dei ha ka 13 tarik u Kyllalyngkot, 1833, ki shipai British ki la ïohkem da ka jingpynap shrip bad set byndi ïa u ha Dhaka bad khlad hapoh byndi ha ka 17 tarik u Naitung, 1835.

La plie ïa u Motdur jong U Tirot Singh Syiem da u Indian High Commissioner sha Bangladesh u Pranay Verma, u Symbud Myntri Rangbah ka jylla u Sniawbhalang Dhar bad ha kumjuh ruh u Myntri ka tnad Art and Culture u Bah Paul Lyngdoh.

Ha ka jingkren ha katei ka sngi u Ma Sniawbhalang Dhar u la ong, “Ka dei ka sngi kaba sngewsarong na ka bynta ki paid kane ka jylla, katba dang ïashim bynta bad sakhi iaka jingplie ïa u Motdur jong une u riewkhraw kum ka dak ka jingburom ïa ka mynsiem bashlur U Tirot Sing Syiem halor ka jingaiti bad len lade ka jong u.”

U la ong ba ka sorkar jylla Meghalaya kala kut jingmut ban lehburom ïa ki riewïaleh laitluid jong ka jylla ba kynthup ruh u Woh Kiang Nangbah bad u Pa Togan Sangma

 “Nga sngew ban ai ka jingïaroh kaba khraw ruh ïa ka tnad kam poh ïing ka sorkar pdeng, ka High Commission ka ri India sha Bangladesh halor ka jingbteng bad ka jingai jingkyrshan ha baroh ki liang kaba la noh synñiang bad lah ban pynurlong ïa kane ka jingsah kynmaw kaba khraw” la ong u ma Sniawbhalang.

U Bah Paul Lyngdoh u la ong , “Ka jingaiti U Tirot Sing iaka jingim, ka pyni ka dak jong ka mynsiem ba shynrang, ka jingshlur, bad ka jinglong nongïalam hapdeng ka jingshisha kaba paw ba ki Syiem Khasi ki la wan ban snohkti lang kawei naduh na ka Hima Shillong haduh Rambrai, ha kito ki por ba ka leit ka wan ka dang long ka dawbah. Ngi la lah ban ïoh ki Syiem, na ki Hima jongngi bad na ka jylla kiba lah ban wanlang kawei kynhun.”