La plie iaka jaka shna LED Bulb ka Jalyiah IVCS

Syllad | The Rising MeghalayaDecember 16, 2023

Ka Jalayiah IVCS ka la plie iaka jaka shna LED Bulb Assembling Unit haka jingialang kaba la long ha 14 tarik Nohprah haka shnong Jalayiah.

U Deputy Commissioner, East Jaintia Hills District Abhilash Baranwal, IAS kum u kongsan ula plie ia kane ka jaka shna bulb haka jingdonlang u Ma Deibor Suchiang Waheh Shnong ka Ladrymbai Dongwah uba long kum u symbud kongsan.

U Abhilash Baranwal kum u kongsan haka jingkren ula ai khublei bad iaroh iaka Jalyiah IVCS kaba la lah ban shna ia u LED Bulb bad lyngba kane ki briew ki lah ban ioh kam ioh jam khamtam ha kane ka pyrthei kyrduh kam kyrduh jam. Ula ong ruh ba ka Jalyiah IVCS kadei kaba la kiew bha hapoh ka East Jaintia Hills District kumjuh hapoh ka jylla.

U Ma Deibor Suchiang kum u symbud kongsan ula kitbok kitrwiang iaka Jalyiah IVCS ba kan nangtrei shitom khnang ba ki khun shnong kin ioh jingmyntoi na ki kam jong kane ka society.

Kiwei de kiba donlang ki long u Ma Hunlang Blah, District Project Manager, District Management Project Unit, East Jaintia Hills bad ki staff jong ka District Project management Unit (MBMA), ki Waheh Shnong, ki nongshong shnong ka Jalyiah bad kiwei kiwei.

Kino kino kiba don jingmut ban thied ia u bulb light lane kiba kwah ban ioh jingtip bniah iaki dor lah ban phone ha une u nomber 87874 83018.