La plie ïaka jingrakhe dap 100 snem ka ïungwalieh Dorbar Shnong Chilliangraij

Syllad | The Rising MeghalayaApril 20, 2019

JOWAI: U Director Arts and Cultural jong ka sorkar Jylla u Bah W Nongsiej ula wan ban plie ïaka jingrakhe dap 100 snem ka ïungwalieh ka Dorbar Shnong Chilliangraij, Jowai haka sngi Saitjaiñ. La tei ïa kane ka ïungwalieh naduh u snem 1919 bad yn rakhe ïaka jingdap shispah snem baroh shisnem lynter da ki prokram bapher.

Ka Shnong Chilliangraij la tip ïaka kum ka Khonraij haka niam ka rukom bad kadei kawei na ki kyntoit kaba la rim tam ha ka shnong Jowai. La seng shnong nyngkong eh da ki saw ngut shipara “Ka Bon”, “Ka Tein”, “Ka Wet”, bad ka “Doh” (Kine ki saw ngut shipara la ngeit ba ki dei ki khun puri blei).

Nalor u Bah W Nongsiej uba long kum u kongsan la ïadonlang u Dolloi ka Elaka Jowai u Ma Puramon Kynjing uba long kum symbud kongsan, u Waheh Shnong DH Pde, u General Secretary  ka Shnong Chilliangraij u A Lanong, Chairman Organising Committee CW Niangti bad kiwei kiwei.

“Ki longshwa manshwa jong ngi kidei kiba stad kiba ba iohi jngai bha bad ban im bha im miat ki nongshong shnong kila shna ïa ki ïing dorbar ban ïakren sani na ka bynta ban ïatei ïaka imlang ka sahlang bad u khun u roit ka shnong ka thaw”, la ong u Bah W Nongsiej.

Ula kyntu ïaki nongialam shnong ka Chilliangraij ban pynneh ïaka jinglong tynrai ka rukom synshar shnong bad pyniaid shnong ban neh ka riti ka dustur pateng la pateng.

Ha kane ka jinglehkmen dap 100 snem ka ïungwalieh la plie ïa u maw sah kynmaw, la pyllait paidbah ïa u logo ka shnong bad la ot cake. La pynbshongshit ïa kane ka prokram plie  da ka jingrwai ka shad kaba la ïashimbynta da ki khun ka shnong.