La plie iaka kpep thang metiap ba nyngkong ba pyntrei na ka skim bylla 100 sngi ha Jylla

Syllad | The Rising MeghalayaDecember 4, 2020

Ka Kong Isawanda Laloo, IAS, Deputy Commissioner, East Khasi Hills kala plie paidbah ia ar tylli ki projek – ka jaka pynlang um ba la pyntrei da Pdengshnong VEC bad ka kpep thang metiap briew da ka Pynshongkhla VEC- ha ka Shnong Umphrup, Khyrim Syiemship haka sngi Thohdieng.

Ha kane ka sngi la sakhi lang ia ka jingplie ia kine ki ar tylli ki projek da u Paiem Dr Balajiedsing Syiem, Syiem ka Hima Khyrim, u Bah Ronnie Wahlang, BDO ka Mawryngkneng C&RD Block, ki nongialam na kitei ki ar tylli ki VEC, ki nongialam shnong bad ki nongtrei bylla na katei ka skhim ryngkat ki nongshong shnong.

Ka Kong Isawanda Laloo kala ai jingīaroh ia ka Dorbar Shnong Umphrup bad kumjuh ia ka Mawryngkneng C&RD Block.

“Ki kam ki pyni ia ka jinglah bad jingïatreilang ban saindur thymmai ia ka jaitbynriew bad ia ka imlang ka sahlang lyngba ki projek na kane ka skhim,” la ong ka Kong Isawanda.

Ka Kong Laloo, haba plie ia ka jaka pynlang um ka la ai ka jingiaroh shikatdei eh ia ka Pdengshong VEC kaba ym tang ba ka la lah ban pyntrei ia ka skhim pynlang um ha ka rukom kaba dei, ka la ong, “Ki don ka jingiohi jngai bad jingkitkhlieh na ka bynta ka pateng ka ban wan”.

Haba plie ia ka kpep thang metiap briew- kaba nyngkong eh ha Rilum Khasi bad Jaintia ban pyntreikam lyngba ka skhim MGNREGS- ba la pyntrei da ka Pynshongkhla VEC, ka DC ka la pynpaw ia ka jinglyngngoh ba ka VEC kaba don tang 72 tylli ki Job Card ki la lah bam saindur bad shna ia kane ka kpep. 

Ka la pynpaw ruh ka jingkmen kaba khraw ba ka VEC ka la shna ia katei ka kpep kaba la pynwandur itynnad bad ia kaba yn aiti ha ka shnong ba kan pyniaid ia ka. “Kaba kham sngewtynnad shuh ka long ba ia kane ka kpep yn pyndonkam da baroh ki nongshong shnong khlem Kheiñ ia ka jingngeit kaba ki don”, ka la ong.

Na ka liang u Bah Ronnie Wahlang u la pynpaw ia ka jingsngew sarong ia ka shnong Umphrup kaba la lam khmat ia ka Ri Khasi Jaintia baroh kawei ha kaba ka VEC Pynshongkhla ka la shim ia ka sienjam ban tei da ka kpep naka bynta ban pyndonkam da ka Shnong.

“Ha kane ka juk ha kaba ki jaka ki la nang duna bad khapngiah, ka jingleh jong ka Pynshongkhla VEC ka long ka nuksa kaba khraw ia kiwei pat”, u la ong bad bynrap, ” Ka shnong Umphrup ka long ka shnong kaba iohi jngai ha kaba ki nongkitkam ki don ka jingiatreilang ban wanrah ka roi ka par bad ka bha ka miat jong ki nongshong shnong”.

Ha ka jingplie ia ki jaka pynlang um ha Pdengshnong, u BDO u la ai jingiaroh ia ka VEC ba ka long kaba don ka jingkitkhlieh ia ka pateng ka ban wan da kaba hikai ban tyngkai bad sumar ia ka um bad tyllong um. “Ka dei ka kamram jong uwei pa uwei ban ban tyngkai bad ban pyn neh pynsah ia ki tyllong um kiba don ha ki shnong bapher bapher ka Ri Khasi,” la ong u BDO. 

U Paiem Balajied Syiem da kaba ai ki kyntien kyrkhu kyrdoh ia ki khun ka Hima, u la ai jingiaroh ia ka Mawryngkneng C&RD Block bad ki VEC hapoh ka shnong Umphrup. “Ka long ka jingkmen ban ïohi ba ki shnong ki thaw bad ki khun ki hajar ki la nang kiew ha ka kam ka jam ban saindur ia ka imlang sahlang da ka jingïatreilang”, la ong u Paiem.

Ban pynshongkun shuh shuh ia kane ka sngi ban sah kynmaw ha kine ar tylli ki shnong, la sakhi ia ka jingrwai na ki rangbah jong ka Shnong Umphrup kiba la rwai shem mynsiem ha kaba iadei bad ka umbam umdih. Ki samla na Pynshongkhla ki la pynpaw ka jingpynneh ia ka riti dustur da kaba pyni ia ka shad mastieh kaba ju don naduh u mynbarim.