La plie iaka Meiramew Cafe ha Cham Cham, ka shnong kaba don shibun ki jaka jngohkai

Syllad | The Rising MeghalayaDecember 2, 2020

Ka Society for Urban and Rural Empowerment (SURE) kala lah ban plie sa kawei pat ka dukan die jingbam tynrai ka ba ar ka ba la tip kum ka Meiramew Cafe lane Mother  Earth Cafe ha ka shnong Cham Cham, East jaintia Hills District.

Ia kane ka Meiramew Cafe la plie haka 30 tarik Naiwieng haka jingialang kaba iadonlang u waheh shnong Cham Cham ma Luh Dkhar bad ki nongtrei jong ka SURE, ki ASHA  bad ki to kiba iadonbynta ha ka ban pynbha pynmmiet ia ka dukan.

Ka jingplie ia kane ka  Meiramew cafe ka long  shibynta na kawei na ki project jong  ka “No one shall be left behind initiative” ha ryngkat ka jingiatreilang bad ka North East Slow Food  and Agro biodiversity  Society (NESFAS)   kaba  la bei jingiarap  da ka  Rural Electrification  Commission (REC).

Ka shnong   Cham Cham ka jngai kumba 33 Km na Jowai na Khleihriat pat kumba 24 km. Kane ka thain don shibun ki  jaka jngoh kai kynthup ia ka Moopun waterfalls –Mutong  village, Rynji Falls, Sahksaw –Cham Cham, Latang falls –Lumchyrmit, Umbyrlein waterfalls –Rangad  village bad kiwei kiwei.

U Waheh Shnong ka shnong Chamcham Ma Luh Dkhar haba ai jingkren u iathuh ba kane ka dukan ka long ka ba la rim bha bad ka long ruh ka ba nyngkong eh ha shnong, u ai khublei  ruh ia ka SURE kaba la lah shisha ban pynurlong iaka jingthmu da kaba la lah ban plie ia kane  ka Mei Ramew Café.

Na ka liang ka shnong kala rai ban  sdang noh ban buh noh ia ki tiar tynrai kiba ki thain ki thaw ha kane ka dukan meiramew  khnang ba ki tourist kin dup tip kiei ki tiar ki  tar ba ki briew  ki pyndonkam ha ka rep ka riang sha kane ka thain.

Na ka liang ka kong Roly Phawa ka ba long ka trai jong ka dukan Mei-ramew café, kala ong ba kan treishitom ban pynbha pynmiat ia kane ka dukan bad kala pynpaw ka jingsngewuh iaka jinghikai kaba la ioh naka SURE bad NESFAS.

Ka kong Pasqualina Lamare  kaba long kum ka associate jong ka  SURE ka ong ba kane  ka dei  sein ba ar  ba ki  la lah  ban plie ia ka Meiramew café. Na ka liang SURE ka thong jong ka long ba kumno  ban pynneh pynsah  ia ka bam tynrai, rep tynrai  ki ba mynshwa longshwa ki hikai namar mynta pyrthei  bunsein  hi ki khynnah  mynta kim tip  shuh  ia ki  jing bam  tynrai.

“Lyngba  kane ka  Meiramew cafe  kan iarap ruh ia ka ioh  ka kot bad kumjuh ruh  ka ong  ba bun sein hi ki tourist ki  sngewtynnad  ban   bam  ia kine ki  jingbam  jong ngi,” la ong ka Pasqualina bad kyntu ruh ia ka kong Roly ba in leh khuid  bha um tang mynta ka sngi   lane kat ba dang don ka project, hynrei man la ka sngi khnang ba ka jingmlien jong ka kan  iarap ban pynbha ia ki dukan jong ka.