La plie iaka Multi Speciality Clinic kaba nyngkong eh ha Khliehriat, kaba seng da u doktor uba ngat iaka aksident kali

Syllad | The Rising MeghalayaMay 22, 2023

Haba don ka mon ba jwat kam don kano kano kaba lah ban khanglad khang lynti ban pynurlong ïa kaei kaba thmu, kane ka ktien ka urlong ha uwei u doktor uba la pyndep iaka jingpule (Doctor of Medicine), hynrei ula ngat haka apot kaba sngewsih kaba u duh noh iaka kjat shilliang hadien ka jingjia aksiden kaba ula iakynduh kaba la long kum u mawjynthud haka jingim.

Pynban ka khubor kaba lam sngewtynnad, une u doktor sumar briew um shym la kynran dien bad rai ban ieng hala ki jong ki kjat ban sdang noh da la ka jong ka jaka sumar shimet ban ïa kaba shong kli kti ha ïing.

Une u doktor sumar briew u dei Dr. Nichwa LS Nongtdu, khun phrangsngi jong ka Kong Philis Nongtdu bad (L) M. Suja bad u shong u sah ha shnong Khliehriat kaba don ha East Jaintia Hills District.

U Dr Nichwa ula pyndep ïaka jingpule MD (Doctor of Medicine) ha Safdarjung Hospital, New Delhi. Ula ïoh ruh ïaka Gold medalist ha ka kyrdan Pharmacology bad ula pyndep ïaka fellowship ha ka jingpule Diabetologist kaba pynïasoh naduh London United Kingdom.

Shwa ban wanphai sha la ka jylla, u Dr. Nongtdu ula pyndep ïaki training na Apolo Hospital, New Delhi bad ula trei kum u Senior Residents ha Safdarjung Hospital, New Delhi. Ula trei ruh 2 snem ha Mumbai ha Bharat Serums Vaccine Private Limited kum u Medical Specialist bad Medical Adviser.

Ka jingkylla bah haka jingim jong u Dr. Nichwa ka long katba u dang wan phai sha la ïing namar ba u ïoh shuti, haka miet synïa 17 tarik Nailur 2022 katba u dang ap paralok ha Mawblei, Shillong ula ngat haka jingjia aksiden kaba shyrkhei ha kaba kawei ka trok kit jhur ka la ban ïaka kjat jong u haduh ba un da duh noh shilliang ka kjat bad mynta la pyndait ïaka kjat da u nar.

Hadien katto katne por Dr Nichwa ula rai ba un nym shu shong kli kti ha ïing ha sem hynrei un pyndonkam ïa la ka jingpule bad jingpyntbit ne experience kum u doktor da kaba seng noh ïaka jaka ai jingsumar kaba tip kum ka Maïa Multi-speciality Clinic khnang ban ai jingsumar kaba biang ïa ki nongpang kiba shong basah ha Rilum Jaintia.

Ïa kane ka jaka ai jingsumar la plie paidbah ïaka haka sngi Nyngkong da u Myntri ka sorkar Jylla bad u MLA ka thaiñ u Ma Kyrmen Shylla haka jingdonlang u Deputy Commissioner ka East Jaintia u Abhilash Baranwal, u OC ka Khliehriat Police Station u W Nongtdu, u Fr. Ïohnis Pakma Parish Priest Khliehriat haka jingïalang kaba la pynïaid da ka Dr. Junita Kyndait.

Kane ka ka jaka ai jingsumar ka don harud ka surok bah NH-6 hajan ka Khliehriat Police Station, Dkhiah East, East Jaintia Hills District.

Kadei ka jaka ai jingsumar ïaki jait jingpang ba bunjait lyngba ki doktor kiba la dep pyntbit kum ki Gynecology, ENT, Ophthalmology, physiology bad kiwei kiwei katba ïaka X-Ray, Scanning, Ultrasound shen sa buh ha kane ka jaka sumar.

Ki jait jingpang ba lah ban sumar ha kane ka jaka ai jingsumar ki long ka jingpang Stroke, BP, Diabetics, Thyroid, ki jingpang kiba ïadei bad ki kynthei, ki khynnah, kiba ïadei bad khmat ki skhor nalor kiwei.

Ha ka jingkren u Ma Kyrmen ula ong ba “U Dr. Nongtdu u don ka thong ban ai jingshakri shabar jong ka ri hynrei haka jingïaid lynti ym lah ban tip ïaka jingthmu ba na sha lyndet jong u Blei lehse U Blei u ibit ïa u ban neh hapoh ka District.”

“Ngam poi pyrkhat ban ngan long kumne, lehse kadei mon jong U Blei ba u kwah ïa nga ban neh hapoh ka District,” phla u Dr. Nichwa.

Ula ïathuh ba ka jingplie ïa kane ka jaka ai jingsumar kadei namar ba um lah shuh ban ïaid lynti sha jngai bad u shim ïaka kum ka Start-Up ne ka jingsdang ban ïeng hala ki jong ki kjat.

Ym tang kata ula ïathuh ba ka thong jong u, ka long ban ïarap ïaki nongshong shnong ka District khamtam kito kiba pang Stroke, BP, Diabetic namar bun ki nongpang ki duh ei ïaka jingim tang namar ka jingjngai ki lynti synkieng ban leit sha ki jaka sumar kum sha Shillong ne Jowai.