La plie ïaka ophis treikam ka LYSO & VDP ka Ladthadlaboh

Syllad | The Rising MeghalayaJune 14, 2020

Ka Ladthadlaboh Dorbar Shnong kala plie paidbah ïaka ophis treikam jong ki seng samla ka shnong kaba la tip kum ka Ladthadlaboh Youth &Social Organisation (LYSO) bad Village Defence Party (VDP) haka sngi Saitjain.

Ia kane ka ophis la wan ban plie paidbah da u ma Brightstar Chyrmang, Executive Member jong ka Jaintia Hills Autonomous District Council (JHADC), uba long kum u kongsan.

Ha shuwa ban plie la don ka jingialang kaba lyngkot kaba pyniad da u chairman LYSO Donaldky Shylla haka jingiadonlang u waheh shnong Ladthalaboh u LD Lakiang, u General Secretary u ABM Shullai, u Mehi Lato Secretary LYSO, u Dio Samuel Lyngdoh Secretary VDP, u Augustine Langstang Adviser LYSO nalor kiwei kiwei ki dkhot shnong.

U Ma Brightstar haba kren ula kitbok kitrwiang iaka LYSO bad ka VDP shnong jong Ladthadlaboh ba kin nang lah shuh shuh ban trei na ka bynta ka bha ka miat ka shnong ka thaw bad ban iakhun pyrshah iaki kam sniew haka imlang ka sahlang.

Ia kane ophis treikam ka LYSO bad VDP shnong la synniang pisa da ki rangbah, longkmie bad ki samla ban pynbiang iaki jingdonkam naduh ki almari, ki shuki, ki miej bad kiwei kiwei haduh ba kan da long kaba ophis kaba pura.