La plie iaki kor bad ki tiar sumar bathymmai hapoh Khliehriat Civil Hospital

Syllad | The Rising MeghalayaJune 8, 2024

Kanlong ka sngi ban sah jingkynmaw na ka bynta ka Khliehriat Civil Hospital, East Jaintia Hills, hadien ba la ioh ban plie paidbah ia shibun tylli ki kor mashin bad ki tiar aijingsumar kiba katkum kane ka juk hapoh kane ka jaka sumar ha ka jingiadonlang u Myntri ka sorkar Jylla u Bah Kyrmen Shylla bad ka Kong Santa Mary Shylla MLA kum u Kongsan bad Symbud Kongsan ha ka jingialang.

Kine ki mashin bad ki kor ki bor ba la ioh ban pyllait haka 7 tarik Jylliew, ki kynthup ia ka Modern Laboratory. La bynrap sa 11 tylli ki machine kiba katkum kane ka juk na ka mynta. Kane ka laboratory kaba la pynlong ia kane ka jaka sumar ba kan iaryngkat bad kiwei kiwei pat ki hospital kiba don hapoh ka jylla Meghalaya. Kumba ka long mynta la lah ban leh haduh 142 tylli ki test.

Kawei pat ka kor jingsumar ba kongsan ka dei ka Digital X-Ray Machines ia kaba la pynioh lyngba ka sienjam ba la shim da ki bor pyniaid district hapoh jong ka CSR jong ka HDFC Foundation, ka Digital X Ray ka dei kawei na ki machine ba thymmai jong kane ka juk ba la pyndonkam ha Meghalaya.

Kumjuh ia ka Video Endoscopy System la lah ban pynioh lyngba ka sienjam jong ki bor pyniaid district hapoh ka CSR jong ka HDFC Foundation ka ban iarap shibun ha kaba iadei bad ki lad jingsumar ENT hapoh ka district.

Ha kajuh ka por la lah ruh ban pynioh da kawei ka kali Ambulance lyngba ka DMF da ki bor pyniaid district ka ban iarap ia ka hospital na ka bynta ban aijingshakri bad pynkit ia ki nongpang shaduh Shillong bad Guwahati. Kumba ka long mynta ka Khliehriat Civil Hospital ka pynkynriah ia ki nongpang tang haduh Jowai.

Shuh shuh ia ka kor Mechanized Washer Extractor la pynioh lyngba ki bor pyniaid District hapoh jong ka  NETC CSR bad kane kan iarap ia ka hospital ba kan lah ban pynbha bad tehlakam ha kaba iadei bad ka jingiabit jingpang.

Katba ia ka Conference Hall la thaw da ka Tnat ka koit ka khiah lyngba ka fund ka jong ki hi.