La plie noh iaka 5 Star Hotel ba nyngkong ka Jylla

Syllad | The Rising MeghalayaOctober 14, 2022

Mynnor dei ka jaka kaba isait met, ba ijli,  ka jaka leit bar  ki paidbah, ka jaka theh niut,  bad ba jyllei  ne mih ruh ki har rukom ki kam sniew kam smeh, pynban mynta pat ka sngi, 36 snem hadien, ka nongbah Shillong, ka la ioh ba kan pynpaw ia la ka khmat kaba phuh samrkhie bad dap da ka mynsiem kaba sngew sarong ba ha ki sanphew tylli ki snem hadien ka jingioh ia la ka jong ka jylla kaba pura, ba la lah ban plie noh shi syndon ia ka ka 5 star hotel ba nyngkong eh ha kane ka jylla, kaba tip kum ka Vivanta Meghalaya, Shillong mar pyrshah ka ophis treikam jong  Assembly ha Khyndai Lad.

Kum ka dak jong ka jingkhreh ban sdang pyntreikam noh ia kane ka iing basa  ha kane ka nongbah, ka la don ka jingialang ba la long mynta ka sngi, ha kaba ka la don ka jingia aiti ia u shabi jong kane ka iing basa, kaba la ai da u Myntri Rangbah ka jylla u Conrad K Sangma sha  ki dkhot jong ka Indian Hotels Company Ltd.

Kiba la wan ban sakhi ia kane ka jingkhreh ban plie ia kane ka iing basa ka kynthup naduh u Myntri ba dei khmih ia ka tnat Toursim u bah Sniawbhalang Dhar, u Chairman ka MTDC u Saleng A Sangma,  u Chief Secretary ka jylla u bah DP Wahlang (IAS) nangta ki Chief Secretary barim bad ba la shongthait ka jylla, bad kiba bun ngut ki nongshah khot sngewbha.

Kumban shu kyrtiang dien shaphang kane ka iing basa kaba ia ka kam ka jong ka la khreh shna naduh u snem 1986 shaneng, hynrei hapdeng ka jingpynkhreh wan mih bun tylli ki mawsiang kiba kylla long ki jingeh ban lah ha kaban pyniaid ne pyntyllun shakhmat ia kane ka kam.

Ka jaka ha kaba tei ia kane ka iing basa ka don kumba 8,800 sq.m bad ka don baroh 101 tylli ki kam ia kaba la bynrap lem bad kiwei kiwei pat ki jnit ki jnat bad ki jingdonkam kum speciality restaurant, coffee shops, bar, retail shops, and a banquet hall, ha kaba ka trai jong ka dei ka Meghalaya Tourism Development Corporation Ltd, bad kaba la ai wai noh kumba 33 tylli ki snem ha ka dur jong ka PPP ia kaba yn shimti bad ban pyniaid ia ka da ka Indian Hotels Company Ltd.

Haba kren kum u kongsan, u Conrad, u pynpaw ia ka jingkmen kaba khraw, ba ha kaba kut ia kum kane ka sngi  la lah ban pynurlong ia ka jingthrang bad angnud ka jong u paidbah, ha kaba  ka sngi kam kut tang ha ka jingplie paidbah ia ka,  pynban da ka jingoplie ia ka, ka jingkyrmen bad ka lawei kaba phyrnai mynta ka la wan ban ap dngong ia kane ka jylla, kampher ha ka liang ban aikam ai jam, ka jingwan bun ki nongwan jngoh kai pyrthei na kiwei pat ki ri, ka jingplie  ia ka lad ioh kamai kajih ki paidbah bad kumta ter ter.

U sngew ban ong ba naduh kaba sdang ka sorkar hapoh ka jingialam ka jong u, ka shim khia ban leh ne ban trei ia kino kino ki kam kiba baroih shi katta tylli ki snem ki la sahdien, hynrei ha kiunbe ki saw snem shiteng, kane ka sorkar ka jong u, ka la lah ba kan pyndep lut ia ka.

U Conrad u la batai ruh ia ka lad kamai pisa, kaba ka jylla kan khreh ba kan ioh hadien ka jingplie ia kane ka iing basa bad kyrmen ba nangne shakhmat sa kiwei kiwei pat ki iing basa kiba syriem kum kine, bad kiba don hapdeng ka jingtei ne shna ia ki yn sa lah ban pyndep noh ia ki ha ka por kaba la buh.

Kiwei kiwei kiba la ai jingkren ha kane ka sngi ka kynthup ia u bah Sniawbhalang Dhar, u bah DP  Wahlang, u Saleng A Sangma, ka Deepika Rao Executive vice president Indian Hotels Company Ltd ka kyntien pdiang snewbha la ai da u Dr Vijay Kumar D (IAS)  Commissioner & Secretary Tourism ka sorkar bad ka kyntien ai khublei la ioh na u Vikas Agarwal MD&CEO, SM.