La plie paidbah iaka Farm Northeast Project ha Ingkar Nongjngi

Syllad | The Rising MeghalayaApril 20, 2023

Ka Jaintia Hills Development Society (JHDS) kaba pyniaid ia ka FARM Northeast Project kala plie paidbah iaka bynta basaw jong ka project (Phase-IV) ka ban pyntreikam ha kine ki lai snem ban wan ha ki 12 tylli ki shnong kiba hap hapoh ka Namdong, Thadlaskein bad Laskein Block haka sngi ba Ar.

Ia kane ka project la plie paidbah ha Ingkar Nongjngi da u BDO ka Namdong Block u Ma B Sungoh ha ryngkat ka jingiadonlang ka Agriculture Development Officer Laskein Block ka Kong R. Lamare, U AGM ka NABARD u Bah Grevile Kharlukhi, ka  Dr. RM Lamare MBBS, u Director ka JHDS u Fr. Manbha Pakem, u Garhard Albert President KHUBLEI Germany bad kiwei de ki heh sorkar.

Ka FARM Northeast Project la sdang ban pyntreikam iaka naduh ka snem 2013 ha ki bun tylli ki shnong ha rilum Jaintia. Ha kine ki 9 snem bala pyntreikam iaka projec ki nongrep kila ioh shibun ki jingmyntoi khamtam haka rukom rep tynrai (organic farming), ki jingpynkhlain ia ka rukom treikam ki Dorbar Shnong, ki jing pynkhie im bad pynneh pynsah ia ki dawai kymbat, ka jingrep krai, ka jingpynkhlain ia ka iew ka hat bad kiwei de ki jingai jinghikai ba har rukom. Ha kane ka bynta ka basaw (Phase-IV) kane ka project ka don ka jingthmu ban pyniar shuh shuh ia ka jingrep krai, ban pynmih shuh shuh shibun ki mar-rep katkum ka jingdonkam, ban ban pynneh pynsah ia ka mei mariang da kaba pyniar ia ki jingthung dieng (mass plantation) bad kiwei de ki jingai jinghikai.

U BDO ka Thadlaskein Block haba kren ula iaroh iaka JHDS kaba la shim ia kane ka sienjam ban kyntiew ia ka ioh ka kot ki nongrep ha kine ki 12 shnong. Shuh shuh u la pynpaw ruh ia ka jingkloi ban ai jingkyrshan bad iatreilang lynba ki lad jingiarap kiba ka Block office ka don.

Ha kane ka sngi la ioh ruh ia ka jingbatai halor ki jingmyntoi jong u Krai ha ka jingkoit jingkhiah ki briew ia kaba la ai da ka Dr. RM Lamare, Govt. Doctor Retd bad ka jingdonkam ban pynneh pynsah ia ka jingsboh ka khyndew ia kaba la ai da ka Kong R Lamare ADO Thadlaskien Block.

Ban pynkhraw shuh shuh ia kane ka sngi, la ioh ruh ia ka jingsakhi (testimonial) na ki nongrep krai ka shnong Samanong ha ryngkat ki jingrwai bad ruh ka jingshad na ki khynnah skul ka shnong Ingkar.