La plie paidbah iaka iew online ba nyngkong na Rilum Jaintia

Syllad | The Rising MeghalayaAugust 16, 2020

U MLA jong ka Jowai u ma Wailadmiki Shylla ula plie iaka iew online kaba nyngkong ha rilum Jaintia ban iarap iaki nongseng kam lajong ban kyntiew iaka lad kamai kajih jong ki.

Ia kane ka iew online kaba die iaki mar kiba pynmih ki nongrep, ki nongthain nongthaw bad kiwei kiwei la plie paidbah haka sngi rakhe pyndonburom iaka jingioh laitluid ba 74 ka ri ha Infinity Hall, Mooralong Lathadlaboh, Jowai.

Kane ka rynsan online ka dei ka omechan.com kaba don iaka thong ban pyniaid iew iaki mar ki mata jong ki nongseng kam lajong lyngba ka rynsan online ha Jylla.

“Ka jingsdang ban shna ia kane rynsan kadei hadien ba ki nongseng kam lajong kum ki nongshna, nongthaiñ bad nongpynmih mar bam kila iakynduh jingeh ban die iaki mar ki mata jong ki namar bym don ïew don hat shuh bad shah ktah ka ïoh ka kot namar naka jingkhang khyrdep (Lockdown) ban ïakhun pyrshah ïaka khlam COVID-19,” ong u Bah Russel Nongrum u trai jong ka Omechan.

Kane ka rynsan online kaba khlieh da u Bah Russel la iatreilang bad ka kynhun jong ki samla kiba angnud kumno ban iarap ïaki briew kiba trei kam lajong kiba don ha sor bad nongkyndong kiba ieng hala ki kjat ban die ïaki mar jong ki lyngba ka online.

“Ka Jaintia Hills kadei kaba lah ban pynmih shibun jait ki mar, hynrei khlem ka rynsan kan buh jingeh iaki nongseng kam lajong namar bym don shuh ki prokram kum ki Exhibition bad ki trade fair,” la ong u Bah Pearlet Toi General Manager District Commerce& Industries Centre.

Ula iathuh ba ophis jong u ka iarap iaki nongthaiñ kumjuh kiba kamai kajih da ki mar kiba mih na ki shnong bad thaiñ. Ula ong bun ki iing ki sem haki thaiñ nongkyndong khamtam ha Laskeiñ Block kiba shaniah haka kam shna bad thaiñ jingthaiñ.

Ula iathuh ba la ialam ia u Bah Nongrum bad ki paralok jong u sha kylleng ki jaka nongkyndong khnang ba un iakynduh bad ki nongthaiñ nongshna naduh katei ka sngi u khlem pynleh nohei ka por bad haka 13 tarik mynta u bnai la pynlong iaka Workshop ban ai jinghikai iaki kumno pynpyniaid iew iaki tiar ki tar jong ki lyngba ka online.

“Ngi donkam bha ban pynkiew ïaka ioh ka kam jong ki nongkyndong bad ka long kaba donkam bha ban pynïoh kam ïoh jam iaki samla bym don kam don jam”, ong u Bah Toi.

U HH. Mohrmen haka jingkren ula ong, u syllad.com/store hapdeng ka jingkhang khyrdep (Lockdown) ula iarap ïaki spah ngut ki nongrep bad jin lada ym don u syllad.com/store ym tip aiu kan jia iaki jhur ki jhep jong ki nongrep ha kato ka por hynrei da ka jingdon u syllad.com/store ki nongrep ki la ioh ban pyniaid iew iaki jhur jong ki.

U Bah Wailadmiki Shylla haka jingkren ula ong, kane ka iew online kadei kaba la sdang naduh ka por National Lockdown ban iarap iaki nongkyndong kiba im da ka rep ka riang.

“U Bah Nongrum ula pyndonkam hok iaka sap jong u khlem da shimkabu ban kamai spah ne ban pynheh ia kata ka kamai kajih jong u, hynrei ula shim iaka lynti kumno ban iarap iaki nongrep”, ong u Bah Shylla.

Ula kyntu iaki nongseng kam lajong kiba don ka sap ban thaw ban thain bad ban shna jingbam ban pynrung kyrteng haka Omechan ban kyntiew iaka lad kamai kajih jong ki.