La plied ki paid nongkyrshan ka kot iaki nia ki jutang ther iaka bom ha Amlarem Constituency

Syllad | The Rising MeghalayaOctober 8, 2022

Ka Elekshon sha ka ïing dorbar thawaiñ ka dang jngai sa kumba lai bnai tam, hyrnei ka National Peoples’ Party (NPP) jait ba ka shap jong ka kadei ka kot kala sdang ban pyni iaki nia ki jutang bad ther iaka bom ne ka United Democratic Party (UDP) ha Amlarem constituency, kaba u MLA jong ka u dei u Ma Lahkmen Rymbui.

Ki nongkyrshan ka NPP kiba kynthup ia u Portanri Pakyntein uwei na ki nongkyrshan ba radbah u Ma Lahkmen bad u MLA ka Congress na War Central uba la iasoh noh sha ka NPP u ma Holando Lamin kila ther tyngeh ia u Ma Lahkmen Rymbui haka jingialang pdiang burom ka NPP- 7 Amlarem Assembly Constituency ia u MLA barim ka War Jaintia u ma Riang Lenon Tariang uba ju bat ia kam u deputy speaker ha iingdorbar thawain ka jylla bad myntri sorkar.

Kane ka jingialang pdiang burom kala long ha hall jong ka Syiem Jingsuk Amlarem haka sngi Thohdieng.

U Ma Lahkmen u dei u Myntri Sorkar uba bat iaka kam pohiing, tnad pule puthi, District council affairs nalor kiwei, pynban wat la u dei u myntri haka sorkar MDA kaba iatreilang ka NPP bad UDP bad kiwei kiwei ki seng ula shah ther tyngeh bad kynnoh ba ula phiel kum u myntri ban wanrah iaka roi ka par hapoh ka thain Amlarem baroh kawei.

Ha kane ka jingialang u President jong ka NPP West Jaintia Hills District uba long u MLA Jowai Constituency u Ma Wailadmiki Shylla ula put turoi ba ka NPP kan jop haduh 33 ngut ki MLA kaba kynthup 18 ngut na Rilum Khasi Jaintia bad 15 ngut na Rilum Garo.

U Ma Wailad ula pdiang burom ia u Ma RL Tariang bad ki nongbud jong u kumjuh ki nongkyrshan ka UDP bad congress kiba la iasoh noh sha ka NPP.

U Ma Wailadmiki ula ong “Ka sorkar ka la dei lypa ka jong ngi, sah haka rai jong ki nongthep vote jong ka Amlarem Constituency lada ki kwah ban donlang bad ka sorkar kin ai ka jingkyrshan ïa u kyrtong jong ka NPP u Ma Stephanson Mukhim uba long ruh kum u khun rit jong u Bah Prestone Tynsong bad uba don ryngkat ryngkat bad u Myntri rangbah ka Jylla.”

Ula ong ba na ka liang ka party ka la leh ïaka kam bad u khmih lynti ba ki paidbah nongkyrshan kin trei shitom namar kane kamdei ka kam kaba suk khamtam hapoh ka Constituency Amlarem kaba u Ma Mukhim un ïakhun pyrshah bad uba don haka bor.

Ula ïathuh ruh ïa kiba bun ki kam kiba ka sorkar MDA hapoh ka jingïalam jong u Conrad K Sangma ka la leh shibun ki kam ba bha na ka bynta ka bha ka miat jong ki paidbah. Kiba bun ki jingeh kiba ka sorkar MDA ka ïatyngkhuh kynthup ka border issue, ki jingeh jong ki nonghikai bad kiwei kiwei kidei ki jingeh kiba la shna bad thaw da ka sorkar barim, hynrei wat katta ka sorkar ka iakhun ban pynjem ia kine ki jingeh.

Ula ïathuh ba ka party ka jied ïa u Stephanson Mukhim kum u kyrtong jong ka na ka 7-Amlarem Constituency namar ba udei u briew uba jan sha u paidbah wat haba ula shah rem ruh.

U Ma Stephanson Mukhim haka jingkren ula ïathuh ba haka por ka jinglong MLA jong u ula ïaleh katba lah ban wanrah ïaka roi ka par hapoh ka constituency. U kyrmen ba nangne shakhmat un nangtrei shitom shuh shuh bad pynjanai shuh shuh ïa kata ka jingtreikam ban kiew ka Constituency.

Ka Amlarem kadei kaba kaba donbok tam haduh katta katta namar ka ïoh ïa u Myntri uba khlaiñ bor bha hapoh kane ka sorkar namar ki saw tylli ki portfolio kiba u bat kidei kiba hakhmat eh ne ki ‘Doh pasoh’ kiba lah shisha ban wanrah ka jingïarap ïaki paidbah. Hynrei kumba long mynta kine ki portfolio kiba u bat ka long pynban ka jingshim kabu jong u, la ong ma Stephan.

U Ma Holando, ula ong ba MLA ka Amlarem kum u myntri wat la u bat iaki tnad kiba khlain bor kynthup iaka DCA, pynban ula iuh roit iaka hok district council.

Kiwei kiba la ai jingkren ki long u RL Tariang, u Octomewot Lamin, u Reachingson Khongwang bad kiwei haka jingïalang kaba la pynïaid da u Het Pohthmi MDC.