La pyllait ia ka kot ‘Ka Saiñ Pyrkhat u Khasi bad ki Dak Thoh ha ka Ktien Khasi’

Syllad | The Rising MeghalayaOctober 15, 2024

Ka kot ‘Ka Saiñ Pyrkhat u Khasi bad ki Dak Thoh ha ka Ktien Khasi’ ba la thoh da u Bah Phrikshon Kharshiing la pyllait paidbah da u Bah Pyniaid Sing Syiem, CEM KHADC haka 14 tarik u bnai Risaw.

La ia don ryngkat lang u Bah Pynshngaiñ N Syiem, Dy. CEM KHADC, Dorbar Thawaiñ Dalariti (Deputy CEM, KHADC), Bah Lamphrang Blah, Chairman, KHADC, Bah Bindo M Lanong bad Bah Victor Rani ki MDC JHADC bad Bah Kitbor W Nongrum, dkhot rangbah ka Khasi Authors Society.

U Kongsan, Bah Pyniaid Sing Syiem u la ai ka jingiaroh ia u Bah Phrikshon na ka bynta ka kot ba u la thoh ka ba long ka ba kynsai ha ka imlang sahlang bad u la kular ban buh ha ka thiar kynshew kot jong ka Dorbar Thawaiñ Dalariti bad ban phah ruh sha ki shnat ha ka jylla. U la pynsngew ba ka shlem treikam jong ka Dorbar Thawaiñ Dalariti ka long ban pynshlur ia ki kam ki ba dei ban kyntiew ia ki snap ka riti dustur, kham tam kito ki ba iadei ban sot kum ki kyndon aiñ ha ki dulir jong ka Dorbar Thawaiñ Dalariti.

La ai jingkren shaphang ka pasoh jong ka kot da ka Dr Ailynti Nongbri bad ka jingkren pdiang da ka Dr Cherry Kordor Kharshiing ha ka ba la pyniaid da u Bah Raphael Warjri ia ka jingialang ban pyllait ia ka kot ka ba kynthup khatwei tylli ki lynnong ki ba la phrang ka jingtip shaphang ka saiñ pyrkhat Khasi ha ka ba iadei bad ka jingim briew ha ka imlang sahlang bad khamtam ha ka ba pyndonkam ia ki dak thoh da ka ktien Khasi ha ka thoh ka tar.