La pyllait ia ka Meghalaya bad Nagaland na ka jingtreikam ka CUET
Ka Tnat pule puthi ka Sorkar Pdeng kala pynbna ba la pyllait ia ka Jylla Meghalaya bad ka Nagaland na ka Common Unversity Entrance Test (CUET) 2024-25.
U Under Secretary kane ka Tnat Pule u Gopesh Kumar ha ka shithi u la pyntip ba ka UGC ka la dep ban ai ia ka jingmynjur halor ka jingkyrpad jong ka sorkar Nagaland lyngba ka NTA ha kaba la shah ia ki kolej kiba don ka jingiateh ha ka Jylla ba kin shim admission ha ka rukom kumba ju leh da kaba pyllait noh ia ka jingpyntreikam ia ka CUET na ka bynta u snem 2024-25.
![](https://www.syllad.com/wp-content/uploads/2024/09/JIT-Vacancy-823x1024.avif)
Ka UGC ka la ai ka jingmynjur ia ka rai ba la shim da ka Tnat pule puthi ka sorkar Pdeng bad mynjur ban shah ban pdiang klas ia ki kolej kiba pyniasoh bad ki Central University ha ka Jylla Meghalaya bad Nagaland, kata kum ka NEHU bad ka Nagaland University katkum ki kyndon pynrung klas kumba ju leh da kaba pyllait noh na ka jingtreikam jong ka CUET, kata tang na ka bynta u snem 2024-25, ong u kyrwoh.
Halor kane ka jingpynbna, na ka liang u Myntri Rangbah ka Jylla u Conrad K Sangma u la pynpaw lyngba ka X (Twitter) da kaba ong, “Nga sngewkmen shibun ban pyntip sha ki samla pule ba ka jingshim admission ha ki kolej kiba pyniasoh bad ka Central University ha Meghalaya, la pyllait noh na ka jingpyntreikam ia ka CUET na ka bynta une u snem ba mynta. Nga ai khublei ia u @dpradhanbjp halor ka jingbteng ban ai ia ka jingkyrshan bad sngewthuh”.
Lah ban kdew ba ki samla pule kiba leit ban ialeh ia ka eksam CUET dang shen ki la iakynduh ia ka jingeh hadien ba ka la mih ka jingklumar jingmut.
Kane ka shithi jingpynbna ka la wan long ruh hadien ba ki samla pule ki la dep ban leit thoh ia kane ka eksam ha kine ki khyndiat taiew ba la dep.
Leave a Reply