La pyllait ia u Bah Prestone Tynsong na Apollo Hospital, shen un ioh wanphai iing

Syllad | The Rising MeghalayaSeptember 18, 2024

U Symbud Myntri Rangbah ka Jylla u Bah Prestone Tynsong u la ioh lait noh na ka jingsumar napoh Apollo Hospital, Delhi hadien ba u la ioh pat ia ka jingkoit.

Haba kren sha ki lad pathai khubor haka 18 tarik Nailur, u nongaiktien ka NPP uba dei ruh u MLA barim ka Mawsynram u Bah Himalaya Shangpliang u la ong, “Ia u Symbud Myntri Rangbah la pyllait noh napoh Apollo Hospital bad mynta u dang don hapoh Meghalaya House bad shen un sa wanphai noh sha Shillong ha kine ki khyndiat sngi ki ban wan.”

“Ka jingai jingsumar ka la long kaba jop bad mynta u la don hapdeng ka met kaba koit ba khiah bad u la sdang ruh ban bam bad ban iaid da lade hi,” ong u Bah Shangpliang.

Nalor kata u la pynpaw ruh ka jingkhublei ia baroh kiba la duwai lem na ka bynta ka koit ka khiah jong u bad ruh ia kito kiba la leit jngoh ia u ha ka por ba u dang shah sumar hapoh Shillong bad ha Apollo kumjuh.

“Ngi ai khublei ia baroh khamtam ia ki nongshong shnong ka Pynursla kiba la duwai na ka bynta jong u,” u la ong da kaba bynrap, “U Symbud Myntri Rangbah un dang bteng ban shakri ia ki paidbah ka Jylla bad na ka liang ka party ka ai ka jingkyrshan kaba pura na ka bynta jong u.