La pyllait ia u Khaw bad Atta rashon na ka bynta ka East Khasi Hills

Syllad | The Rising MeghalayaSeptember 21, 2023

Ka Deputy Commissioner (Supply), East Khasi Hills District, Shillong da kane ka pyntip paidbah ba ia u Khaw NFSA (AAY bad PHH) bad Non-NFSA bad ia u Wholemeal Atta jong u bnai Nailur 2023, la sdang ban pyllait sha baroh ki Dukan sam mar Rashon (Fair Price Shop).

Ka bhah khaw na ka bynta kiba don card AAY ka long haka jingthew kaba 35 kilo shi card (Ym donkam siew pisa). Ka bhah PHH – 5 kilo shikhlieh (ym donkam siew pisa) bad Non-NFSA – 7 kilo 205 gram shi-iing @ Rs.12.70/- haduh Rs.13.00/- shi kilo.

Katba ia u Atta jong u bnai Nailur, 2023 la pyllait ha ka jingthew kaba 5 kilo shi card ha ki jaka sor bad 3 kilo shi card ha ki thain ongkyndong, ha ka dor 10.50/- tyngka shi kilo.

La bthah ia baroh ki Nongsam rashon ban sam noh mardor sha baroh ki nongioh bynta tang mar ia poi kitei ki mar rashon katkum ka bhah kumba la kdew haneng. La bthah ruh ba ki dei ban wah ia ki kyrteng jong baroh ki nongioh bynta bad ka por ban sam ia ki mar rashon ha ki dukan jong ki.

Nalor kata la kyntu ruh ia baroh ki nongioh bynta na ka bhah NFSA ban ai ia ka Aadhaar Number jong ki ha ki nongsam rashon, na ka bynta ka jingiaid beit iaid ryntih jong ka jingsam rashon lyngba ka kor ePOS.

Lada don kino kino ki bym sam, lane sam palat ia ka dor ba la buh, lane ai duna thew, lane ai da ki mar bym biang, ki nongioh bynta ki lah ban pyntip mardor sha ka ophis jong ka Deputy Commissioner (Supply), EKHD, Shillong.