La pyllait paidbah iaka kot- The Khasi States Timeline 1771 – 2017

Syllad | The Rising MeghalayaAugust 26, 2022

Ka Dr (Mrs) E Kharkongor, Principal, Shillong College bad ka Dr(Mrs) A Nongbri, Head of Department (HOD) Department of Khasi haka sngi Palei kila pyllait iaka kot kaba kyrteng- The Khasi States Timeline 1771 – 2017 ba la thoh da u Bah John F Kharshiing bad u Dr Bodhi Sainkupar Ranee, Associate Professor, TISS, Mumbai haka jingialang kaba long ha Shillong College Hall, Bomfyle Road, Shillong.

U Bah John F kharshiing u la pynpaw iaka jingsngewnguh ia ka skul bah Shillong ia ka jingpdiang sngewbha ban plie ia kane ka kot kaba thoh ia ka History bad ka Politics kaba 246 snem (1771-2017) jong ki Khasi States kaba long kaba kongsan bha na ka bynta ki skul bah, ki samla pule, ki nongsynshar, ki riewsaid ain ki nongmihkhmat bad kiwei kiwei. 

Shuh shuh u la ong ba u kyrmen ba kane ka kot kan long kaba iarap ia ka Sorkar Jylla, District Council, ki Khasi States (Hima) bad Elaka bad kumjuh ruh ia ka Sorkar India ha kaba sngewthuh ia ka jinglong kyrpang ka jaidbynriew Khasi bad ki jingsynshar kiba don hapoh ki Khasi States. U la pyntip ba ha ryngkat u Associate Prof. Ranee kane ka long ka kot kaba ar kaba ki la ia thoh lang bad la nang pynkhreh ia kaba lai kaba yn sa pynmih biang hashen. 

U la pyntip ruh ba ia kane ka kot lah ruh ban ioh na Ri Khasi Book Agency, Mawkhar, bad na New Book Center, Laitumkhrah Beat House, Shillong. U la ong ba dang bun ki jingtip ba donkam ban buh thup ha ka kot pule bad kane ka long tang ka jingsdang bad u la kyrpad ia kiba pule ban ai ruh ia la ki jingai jingmut lane ki jingkynthoh khnang ban nang mih ka jingthoh halor ka dur jong ka jaidbynriew.  U la ai khublei kyrpang ia i Principal, i HOD Dept of Khasi, kiba la shim khia ban pynlong ia kane ka sngi kaba iaidbeit.

U Bah John  F Kharshiing, u la ong ba kane ka kot la pynmih khnang ha ka ktien phareng namar kane ka kam jong ki Khasi States ka long kaba hap ban sngewthuh ki bym dei ki Khasi naduh ka Sorkar India kynthup bad kiwei kiwei. U la pyntip ruh ba ka la don ka kot kaba ki la dep pynkhreh ha ka ktien Khasi ia kaba yn sa pynmih hashen.

Ha kane ka sngi la pyniaid ia ka jingialang da ka kong M Marbaniang bad la ioh ia ki kyntien pdiang sngewbha na i  nonghikai Bah S. Kharrymba, la ioh ruh ia ka jingrwai kyrpang na i samla pule na ka Khasi Deptt, Shillong College.