La pynbna iaki iew dielang ha East Khasi Hills District

Syllad | The Rising MeghalayaMay 25, 2021

Ka Deputy Commissioner, East Khasi Hills District haka sngi ba Ar kala pynbna iaki iew dielang (Wholesale & Retail) ha East Khasi Hills District.

Katkum ka jingpynbna kine ki iew dielang ki dei na ka bynta ban die iaki marrep kaba kynthup iaki jhur ki jhep bad ki soh ki pai. Kine ki iew ki kynthup iaka Farmer’s Market 5th Mile Upper Shillong, Farmers Market Umdiengpun 7th Mile kiba hap ha Mylliem Block. Kine ki ar tylli ki iew die kaba ki nongkhaii ki lah ban dielang bad die khutia.

Ka iew Urkaliar Sankhamti Parking Lot, Demsieniong kaba hap haka Zone V bad ka Shiliangum- Lawei Farmer’s Market ha Sohiong ki dei ki iew dielang.

Ha kaba die bad ka jinglong jingman na ka jingpang khlam COVID -19 haka district la buh ruh da ki kyndon ha kine ki iew.

I Director Agriculture in pynthikna bad ban ai jingtip sha ki nongkhaii lane ka kynhun jong ki nongrep. Ban jied ruh iaki jaka, jaka rung jaka mih, jaka ieng kali da kaba iamir jingmut bad ki BDO.

Iaki Car pass yn ai da ka tand ka kam rep kam riang bad ki BDO.

Ki nongkhaii kiba ioh ban rung sha ki iew ki dei tang kito kiba ioh car pass.

Ki nongthied shimet lane ki nongdie madan ym shah iaki ban thied mar na kine ki iew.

Ki Pulit bad ki Incident Commanders ki dei ban pynthikna ba kan don ka jingbud ryngkhi iaki jingbthah ne kyndon bad iada na ka khlam bad kino kino kiba leh pyrshah kin shah pynshitom.

Ka kyndon na ka bynta ka iew dielang ha Anjalee parking Lot bad ka Sankhamti Parking Lot, Urkaliar kan neh kumjuh katkum ka jingpynbna kaba la pynmih haka 24 tarik une u bnai.