La pyndam iaka Containment Zone ha Pyndengumiong Mairang

Syllad | The Rising MeghalayaAugust 4, 2021

U Sub-Divisional Magistrate ka Mairang Civil Sub-Division, Mairang ha ka hukum ba la pynmih haka sngi Balang, u la pynbna ba hadien ba lah dep test lut ia baroh ki High Risk Contact bad hadien ba la lah pyndep ia ka ‘Vaccination Drive’ ha ki saw tylli ki dong ka Shnong Pyndengumiong, kata, ka Dongbir, Donggate, Lumiew bad Lummaralong, la weng noh ia ka hukum containment zone na ka bynta kitei ki saw tylli ki dong naduh ka 4 tarik u Nailar, 2021.

Katba, ka Dong Langstiehrim bad ka Dong Umwiehsup kin dang neh kum ki Containment Area namar ka jingdon jong ki nongshongshnong kiba dang shu ioh ia u khniang jingpang COVID-19 bad namar ba ym pat ioh ban pyndep ia ka ‘‘Vaccination Drive’  ha kitei ki artylli ki dong jong ka shnong Pyndengumiong.

Katkum kane ka hukum, kan don ka jingpyrkhing ha kaba iadei bad ka jingplie jong ki dukan bad ruh ia ki kam shna iing shna surok ha ki jaka paidbah kiba don hapoh ka shnong Pyndengumiong.  

Lah ban pynkynmaw hangne ba la pynhap ia ka shnong Pyndengumiong, kaba kynthup ia ki hynriew tylli ki dong, kata ka dong Dongbir, Donggate, Lummaralong, Lumiew, Langstiehrim bad Umwiehsup,  kum ka Containment Zone ha ka 23 tarik u Naitung, 2021 kum shibynta ban tehlakam ia ka jingsaphriang jong  u khniang jingpang COVID-19 namar ka jingdon jong ki nongpang COVID-19 bad ki High Risk Contact hapoh kane ka shnong. SDPRO, Mairang