La pyndep ia ka jingleh burom ba khatduh ia u Myntri Rangbah barim ka Jylla u SC Marak

Syllad | The Rising MeghalayaAugust 18, 2024

Ka jingleh burom ba khatduh shwa ka jingleit on tep ia ka met kaba sah jong u Myntri Rangbah barim ka Jylla u Salseng C Marak la pyndep ha ka 17 tarik da ka Sorkar Jylla ha Resubelpara Mini Stadium ha North Garo Hills ha ka jingsakhi lang da ki riew sain hima, ki heh sorkar, ki riew pawkhmat bad ki paidbah na kylleng.

Ha kane ka sngi la ia don lang ruh u Myntri Rangbah ka Jylla u Conrad K Sangma uba la pynpaw ia ka jingsngewsih kaba khraw halor ka jingduh noh ia une u nongialam uba shemphang uba don ka jingiadei kaba jan bha bad ki paidbah.

“Ki jingnoh synniang ki jong u kum u nongthaw ain bad Myntri Rangbah ka Jylla ka la lah ban kyntiew bad pynkhlain ia ka Jylla Meghalaya ha ka por ba ka Jylla ka don ka jingsynjor ha ka sain pyrthei bad ka jingkhihwin na ki kam lehnoh. Ka jinglah ka jong u ban pyndep ia ka samoi treikam ba pura ka long ruh ka sakhi ia ka jinglong nongialam ba tbit ka jong u,” ong u Conrad.

U Myntri Rangbah u pynkynmaw ruh ia ka jingiakynduh ka jong u bad u Late SC Marak ha kaba u la khot ia u kum u briew uba jemnud, uba jai jai, uba sngewrit bad uba stad.

“U la ai shibun ki jinghikai ba kordor kiba la iarap shibun ha ka jingroi ha ka jinglong ba shimet jong nga,” ong u Conrad da kaba bynrap ruh ba ka jingim jong une u nongialam barim bad ki jingnoh synniang ki jong u bad ka jingktah kaba neh kaba u la iehnoh ka long ka ba dei ban rakhe kynmaw burom. To ngin burom ia u da kaba rah shakhmat ia ki jingiohi jngai bad ki nongrim ki  jong u bad ban iatreilang ban tei ia ka nongrim kaba u la buh.”

Kiwei pat kiba la aijingkren ha kane ka sngi ki kynthup ruh ia u Lamphang ka iingdorbar thawain ka Jylla Thomas A Sangma, Myntri ka tnad Pule Puthi u Rakkam Sangma, Saleng A Sangma, MP, Tura Parliamentary constituency, MLA, Resubelpara bad Symbud Lamphang u Thomas D Shira, MLA, Mendipathar, Marthon J sangma, MLA, Songsak, Mukul M Sangma nalor bun kiwei pa ki MLA bad ki MDC kiba la wan iashim bynta ha kane ka jingleh burom ba khatduh ia une u nongialam barim.

Ka la don ruh ka jingbuh syntiew na ka bynta u Lat ka jylla u C H Vijayashankar. Katba ia ka lama ka Ri kaba la tap ia ka synduk ba la pynthiah ia ka met jong u la aiti noh hadien sha u khun jong u Late S C Marak u Silman K Sangma. Hadien la tep noh ia kaba sah jong u ha u lum jingtep ha Gajingpara.

U S C Marak 83 snem rta ula khlad noh ha ka step jong ka 16 tarik hapdeng ka jingshah sumar ha Tura Civil Hospital.