La pyndep ia ka jingtohkit, ym pat kem iano iano halor ka jingshah thombor ka longiing haki BSF ha East Jaintia Hills

Syllad | The Rising MeghalayaAugust 31, 2024

U Symbud Myntri Rangbah ka Jylla uba khmih ia ka Tnad Home (Police) u Bah Prestone Tynsong ha ka 30 tarik Nailar u la pyntip ba ka jingtohkit halor ka jingkynnoh thombor jong ki shipai BSF ia kawei ka longiing ha East Jaintia Hills la lah ban pyndep, bad mynta ka jingpynkhreh ban chargesheet ka la iaid shakhmat.

“La pyndep ia ka jingtohkit bad ka jingpynkhreh ban chargesheet ka la iaid shakhmat,” ong u Bah Prestone haba jubab ia ka call attention notice ba la wanrah da u MLA ka VPP na Mawlai u Bah Brightstarwell Marbaniang hapoh ka iingdorbar.

U la pyntip ba hadien katei ka jingjia, la register case hapoh Khliehriat Women Police Station bad la pyngngat hapoh ki kyndon katkum ka section 457, 236, 354, 384 bad 34 jong ka Indian Penal Code, pule ryngkat bad ki kyndon 7 bad 8 jong ka POCSO Act.

U la iathuh ruh ba ha kajuh ka sngi ha ka 20 tarik Jylliew 2024, la eksamin ia u nongujor bad ia ki lanot bad la buh jingthoh ia ki jingkren jong ki, bad baroh ki sienjam kiba donkam kum ka jingpeit bniah ia ka koit ka khiah, ka jingleit jngoh ia ki jaka ba jia bad ka jinglum ia ki sakhi la leh katkum ka ain.

Iaka ejahar la mudui haka 20 tarik Jylliew 2024 da ka longkmie kaba la pynpaw  ba ha ka miet jong ka 19tarik Jylliew 2024 ha ka por kumba 11.30 mynmiet, 3 ngut ki briew kiba kam ba ki dei ki shipai BSF ki la rung jubor ha iing jong ka.

 La ong ba kine ki briew khlem uniform kila rah da ki tiar pynmynsaw ba shyrkhei ki la rung jubor ha katei ka iing bad mar ia rung, kila thombor ia u lok, ki la shim ruh ia u sdie na katei ka iing bad ki la pyrshang ban pyndonkam pyrshah ia ki dkhot jong kane ka iing.

Wat hapdeng ka jingpyrshang jong katei ka longkmie bad ka khun jong ka kaba dang 15 snem ka rta ban knieh ia ka tiar na ki nongthombor ki la shah banbor. Ki nongthombor ki la bteng ban thombor tyngeh ia u lok ka longkmie kaba la pynlong ia u ba un ngat ha ka jingmynsaw.

Hadien kane, ha ka por kumba 12.30 mynstep kine kijuh ki riew shimet ki la wanphai ryngkat bad ka kynhun kaba kham bun kaba don palat 15 ngut bad ki la sdang biang ia ka kam thombor pyrshah ia u lok jong ka longkmie

Ha kane ka jingwan thombor kaba ar, ki la knieh jubor ia ka phone na ka khun jong ka nongmudui kaba dang 15 snem ka rta bad la kynnoh ba ki la jrongkti ia ka. Haba ka kmie jong ka, ka la pyrshang ban iada ia la ka khun, hynrei ma ka ruh ka la shah thombor. Ki nongthombor ki la byrngem shuh shuh ia ka iing ka sem da ki tiar siat, bad ki la maham ia ki halor ka jingma hadien habud.

Halor kane ka jingjia thombor ki shipai BSF haduh mynta ym pat kem iano iano.