La pyni nam iaka jingjop ka skim PMKSY haka Self Help Group Mela ha Shillong

Syllad | The Rising MeghalayaDecember 7, 2023

Ka Meghalaya State Watershed and Wasteland Development Agency kaba hap hapoh ka Tnat Soil & Water Conservation Department haka 6 tarik Nohprah, ka la pynlong ia ka Self Help Group (SHGs) Mela kaba ishongkun kaba hap hapoh ka Pradhan Mantri Krishi Sinchayee Yojana (PMKSY) Watershed Development Component (WDC) 2.0 ha  State Central Library, Shillong.

Haba aijingkren kum u Kongsan ha ka jingialang u Marcuise N Marak Myntri ka Tnat Soil & Water Conservation u la ong ba ka jingpynlong ia ka Self Help Group Mela ka dei ka bynta kaba paka tam ha kaba iadei bad ka jingjop ha ka jingpyntreikam ia ka skhim PMKSY.

Ki stall bad ki jingpyni da ki kynhun SHG ia ki kam jong ki ka pynpaw halor ka jingkut jingmut jong baroh ki nongrep bad ki kynhun Self Help Group.

U la ong ba kane kam dei tang ha kaba iadei bad ki lad jingiarap pisa, hynrei khamtam ruh ha kaba iadei bad ka jinglah ban kyrshan ia lade, ban pynshlur ban trei ia ki kam lajong bad ban pynlong ia ka imlang sahlang kaba kiew shaphrang.

Na ka liang u Myntri u khot u wer ruh ia ki paidbah ba kin don ia ka jingkut jingmut kaba skhem ha kaba iadei bad kumno ban kyntiew ia ka ioh ka kot kaba neh, ban pynneh pynsah ia ki tyllong um bad ban kyntiew ia ka roi ka par ha ka imlang sahlang.

Ha kane ka Mela ki la don haduh palat hynriew phew tylli ki stall ba la pynkhreh da ki kynhun SHG bapher bapher na kylleng ka jylla bad kiba la pynpaw ia ki mar ki mata kum ki mar rep ba khlem ai dawai, ki jingshna kti bad kiwei pat.

Nalor kata ki kynhun SHG ki la lah ruh ban khring lyngba ki jingbam bapher bapher kiba kynthup ia ka ngap, ki ashar, ki musli musla, ki jhur ki jhep, ki umsoh, ki jingshna kti bad kiwei pat ki jait tiar.