La pynkhie im biang ka Thadlaskein Sports Association

Syllad | The Rising MeghalayaOctober 21, 2024

Ka Meghalaya Football Association (MFA) ha ka jingshakri ka jong ka ban kyntiew ïa ka kam ïalehkai phutbol hangne hapoh ka jylla, ka la shim ia kawei na ki sien jam kaba long pat ruh shabar na ka madan ïakhun bad kane ka long ba ka la lah ha kaban leit ba kan pynim bad ba kan pynkhie biang sa shisien ïa kawei na ki synjuk ïalehkai phutbol ba don ha Rilum Jaiñtia, katta ka Thadlaskeiñ Sports Association (TSA) kaba la wan hadien ba kane ka synjuk ka la shah sospon ne bym shym la ïoh shuh ïa ka jingithuh kaba pura ka jong ka la bun bun ki snem.

Kumban shu pynkynmaw biang hangne ba ïa ka TSA ka MFA ka la rai ba kan sospon bad bym ithuh shuh ïa ka naduh u snem 2019 halor ka nongrim jingkynnoh ba ka synjuk ka la ïaid lait na la ki riti treikam ki jong ka bad kumjuh na ki kyndon ba la pruid dak da ka MFA.

Hadien ba ka MFA ka la lah ba kan pynthymmai ïa la ki nongkit kam ki jong ka, ka sien jam ba ka la leh nyngkong eh ka long ba ka thaw shwa ïa ka Adhoc Committee hapoh ka jingïalam ka jong u Chairman bad u Convenor hadien ba la ïoh ïa ka jingkyrshan na ki 31 tylli ki klob kiba la pynïasnoh ïalade bad ka TSA.

Dei haba kane ka adhoc body ka la shimti ïa ka kam, ka la kyntu pat ia ki nongpynïaid ka MFA ba kan ïarap ha kaban weng shwa ïa ka rai sospon ka jong ka, kum shi bynta ban lah ban plie pat ïa ka lad ban ïoh ban lum ia ka jingïalang ka General Body ban lah ban jied ïa ki nongkit kam kiba pura, hangne hi ka MFA ka la leh katba lah ïa la ka jong ka kam bad ban pdiang ïa kane ka jingkyntu jong ka TSA.

ïa ka jingïalang jong ka General Meeting la lah ha kaban pynlong haka 19 tarik u Risaw ha ka jingïalang ba la pynlong ha  Wahïajer Community Hall, ha kaba ka kynhun jong ka MFA ka la lei tba kan don bad ban sakhi lang ïa kane ka jingjied ïa ki nongkit kam ïa kaba la lam khmat da u Secretary ka MFA u ban Sunesh Syiem.

Na ka liang u bah Sunesh Syiem u pynpaw ïa ka jingkmen ba sa shisien la lah ha kaban pynkhie im biang ïa ka TSA, namar kum ka synjuk ka dei ruh kaba la lah ban sei bad ban pynmih ïa kiba bun ki rang ïalehkai ba kynsai ïa ka jylla kiba la bteng ban mihkhmat ruh wat ïa ka ri.

Ha kane ka jingïalang la jied ïa u bah Kmenlang Shylla kum u President, arngut ki vice president ki long u Ebris Pariat bad Mutchwa Thabah, General Secretary bad Assistant General Secretry ki long u Ebormi Lyngdoh bad u Herperty Khyriem, katba u Pyrkhatbha Lamare la jied kum u Treasurer, ïa kaba la bynrap da ka jingjied ruh sa kiwei pat ki Secretery jong ki shnat treikam bapher bapher bad kumjuh ïa ki dkhot  Executive Members.

Da kumta ka MFA,  kaba dang shu kynjoh ïa ka samoi treikam kba dang kumba shi snem ka la lah ba kan leh ïa ki kam kiba khraw katno tam lei lei ban lah ha kaban pynkhie im biang ïa ka TSA, kaba kham hashwa ïa kane ka la lah ruh ban pynkhie im biang ïa ka synjuk ïalehkai jong ka Ri-War Mihngi Football Association, kaba kum ka synjuk kam shym la lah than eh ba kan da treikam  bha la bun bun ki snem.

Kumta ha kaba kut, u bah Sunesh Syiem u ai ïa ka kitbok kitrwiang ïa ki dkhot nongkit kam jong baroh artylli ki synjuk bad kyntu ïa ki ba kin trei shitrhem naka bynta ka bha ka miat jong ki rang ïalehkai ha ki jaka kiba dei bad kiba hap hapoh ki thapniang ka jong ki.