La pynkhuid iaka iitkhmih ka West Jaintia Hills

Syllad | The Rising MeghalayaJune 30, 2020

Shi bynta ban wanrah iaka khuid ka suba bad iakhun pyrshah ia u khniang jingpang COVID-19, ka Dorbar Shnong Tympang Iawmusiang ka la pynlong ka jingpynkhuid iaka Iawmusiang kaba dei ka ïitkhmih jong ka West Jaintia Hills District haka Sngi ba Ar.

Kane ka jingpynkhuid iew ka la sdang naduh ka por 10 baje mynstep, ha kaba ki nongshong shnong ryngkat ki nongshong dukan kila mih paidbah ban pynkhuid iaka Iawmusiang naduh ka surok, ki dukan bad ki jaka die jingdie nongshong die madan.

Ha kane ka jingpynkhuid shnong la pynlong ruh iaka jingsynreit dawai pyniap khniang bad ber iaki bleaching powder ha kylleng ki jaka paidbah.

Hashwa ka jingpynkhuid ka la don ka jingialang lyngkot ha kaba u Waheh Shnong ka Tympang Iawmusiang u Ma Edystone Shylla ula ong wat la kadei ka sien pyrshang kaba nyngkong, hynrei ka Dorbar Shnong ka don iaka thong kaba hakhmat eh ban pynneh iaka jingkhuid jingsuba jong ka thaw.

“Ka jingkhuid jingsuba ka long kaba kongsan haka jingim u briew ban ioh iaka met kaba khoit kaba khiah, nga kyrpad ia baroh ban iatreilang ban pynneh pynsah iaka jingkhuid jingsuba jong ka Iawmusiang, ka iitkhmih jong ka Jowai,” ong u ma Edystone.

Ula kyntu ruh iaki trai dukan kumjuh ki nongshong wai haki bynta ka Iawmusiang ba kin sngewbha ban iatreilang bad ka Dorbar Shnong bad ka kali khat niut ka JMB bad ban bret iaki bniut haki trok bad ym dei ban bret kat shaba lap ba shem.

Ha kane ka jingpynkhuid iew la iadonlang ruh ki Waheh shnong ka sor Jowai kiba la pynshlur iaki briew, ki nongshong iew ba kin bret niut haki jaka bret niut bad ban kiar na kaba lum thup ha ki lynti synkieng ka Iawmusiang.

Photo credit | Seimon Shylla