La pynkup burom ïaki Scouts Master bad ki Guides Captain ha West Jaintia Hills

Syllad | The Rising MeghalayaDecember 18, 2021

Ki bor peit bor pynïaid ka Meghalaya Bharat Scouts & Guides West Jaintia Hills District ha ka 17 tarik une u bnai ka la pynlong da ka jingïalang pynkup burom kyrpang ïaki Scouts Master bad ki Guides Captain kiba la ïoh ïaka District bad State Award jong u snem 2020-21.

Haka jingïalang lyngkot ba la pynïaid da ka Kong S. Tariang District Commissioner Guides la ïoh ka jingkren pdiang burom na ka Kong Siami Shylla District Organiser Guides, MBS&G West Jaintia Hills bad ki jingrwai na ki Rangers jong ka Thomas Jone Synnod College, Jowai.

U Ma Ohiwot Laloo District Secretary MBS&G West Jaintia Hills ula kren ïaka nongrim bad thong treikam jong ka Bharat Scouts & Guides katba u Octomeowt Lamin MDC JHADC kum uwei na ki dkhot uba la shah pynkup burom ula pynkynmaw ïaki kam jong u haka Scouts-Guides Movement kiba long ki jingmyntoi bakhraw ïaka longbriew manbriew jong u.

U Octomewot Lamin haba kren ai mynsiem ïaki dkhot ula ong, to long ka nuksa babha ïaki nongshong shnong da kaba imsngi ban pyndep ïaki kamram katkum ki nongrim jong ka Scouts-Guides kiba ong “Service to God, Service to other and Service to Self”.

Ki Scouts Master bad ki Guides Captain kiba la shah pynkup burom ki long u Ohiwot Laloo, ka Saramai Tariang kiba la ïoh ïaka Long Service Award 2021, u Hopeful Khongstia uba la ïoh ïaka Award Medal of Merit 2021, u Octomewot Lamin Thanks Badge Award 2021, u Adiam U Bthuh bad ka Deigratia War kiba la ïoh ïaka Best Scouts Master & Best Guides Captain 2021, u Damanbha Niang uba la ïoh ïaka Appreciation Certificate, ka CD. Laloo bad u Richard B. Uriah kiba la ïoh ïaka State Teachers Award.

Shuh shuh ha kane ka sngi la pyndep ruh ïaka Induction Ceremony ïaka District School Education Officer, West Jaintia Hills ka ban shimti nangne shakhmat kum ka District Chief Commissioner, MBS&G West Jaintia Hills District.

Ka A. Syiem, District School Education Officer, West Jaintia Hills haka jingkren ka la ai mynsiem ïaki dkhot da kaba ong, to nang trei bha shuh shuh haka thong jong ka jingbha bad ban khot lang ïa kiwei ban don bynta ha kane ka seng kaba ïeng ban shakri ne ïarap ïaki para briew ha kiba bun ki liang.