La pynkut ka MBS&G West Jaintia Hills iaka Gandhi Jayanti Week

Syllad | The Rising MeghalayaOctober 10, 2020

Ka Gandhi Jayanti Week ne ka taiew lehburom kyrpang  ia u  Mahatma Gandhi  ha ka jingiadei bad ka jingdap 151 snem ka sngikha jong u ba la pynlong da ka Meghalaya Bharat Scouts  & Guide, West Jaintia Hills la pynhap pyrda noh iaka haka sngi Thohdieng da u ma Octomewot Lamin, Chairman of  Resource & Mobilise, JHADC kum u kongsan ha ryngkat ka jingiadonlang u W Lyngdoh, Jt. State Secretary MBS&G, State Headquarter, Shillong, u Principal Thomas Jones Synod College, Jowai  Dr. RR. Kharkongor,  ki Scouts Master- Guides Captain, ki Scouts- Guides bad ki Rovers wa ki Rangers.

Ka Saramai Tariang, District Commissioner (G) West Jaintia Hills kum ka shongknor ka la ai ki kyntien maitphang katba kiwei de kiba la iadon bynta ha kane ka prokram ki long u Rising Kharngi, Scout Master ba la ai ia ki kyntien pdiang burom, ka Siami Shylla, District Organiser (G) West Jaintia Hills  District ka la ai ka jingbatai lyngkot shaphang ka Gandhi Jayanti Week katba u Adiam U Bthuh, Jt. District Secretary, MBS&G West Jaintia Hills haba kut u ai ki kyntien khublei.

Ha kane ka sngi la don ruh ka jingpynkupburom ia ki ar ngut ki  Commissioner Scouts  kiba la pyndep ia ka training ha u September 2019 kiba kynthup ia u Dr. R.R.Kharkongor, Principal Thomas Jones Synod College, Jowai bad u D.E.Pariat, Principal Lissi Pearl Secondary School, Mukhla bad shuh shuh laioh ruh ka jingsam ia ki prize sha ki khynnah scouts-Guides bajop haki jingiakop bapher kum ka Drawing-Painting, Calligraphy Competition bad  ka Art & Craft Competition. 

U W Lyngdoh haba ai jingkren kum u symbud kongsan, u la iathuh ba ka long kaei kaei ka khubor ba sngewtynnad ban tip ba napdeng kiba bun ki District Association  jong  Bharat Scouts & Guides, ka Meghalaya Bharat Scouts & Guides, West Jaintia Hills ka dei tang ma ka kaba pynlong ia kum kane ka prokram bad ruh haba kren kyrpang ha kajingiadei bad u Mahtma Gandhi u da khot bad wer ia ki dkhot ba kin ialeh ban bud ia kiei kiei ki jinghikai babha  jong u Mahatma Gandhi da kaba leh ia ki kam babha kiban long ki symbai ia ka pateng jong ka imlang shalang, ka ri bad ka jaitbyriew da ka lynti jong ka jinglong hok, long shlur, lenlade bad wanrah jingsuk.

U Octomewot Lamin, Chairman of Resource & Mobilise, JHADC kum u kongsan, haba ai jingkren u ong  ba u dap da ka mynsiem ba kmen ban iadon byntalang ha kum kane ka sngi namar ka Scouts-Guides Movement kadei kawei na ki shlem saindur ia ka jinglong khynnah skul jong u bad u da iai pyrto ia kiei kiei ki jinghikai babha ba u la ioh naka Movement kiba long shisha ki jigkyrkhu bad jingmyntoi.

Shuwa ban pynkut ia ka jingkren u ai mynsiem ruh ia ki Scouts-Gudes  ba kin iai imsngi ban trei bad leh ia ki kam kat kum ba la dep kular da ki lai tylli ki shympriah kti kiba ong, leh ia kaei kaei kaba bha naka bynta ka imlang sahlang, ka ri bad ka jaitbynriew kumjuh naka bynta ka burom u Blei.