La pynkut noh ka Balang Presbyterian Nongsning iaka jingrakhe dap 125 snem

Syllad | The Rising MeghalayaJuly 30, 2023

Ka Balang Presbyterian Nongsning kala pynkut noh iaka jingrakhe iaka jingdap 125 snem (quasquicentennial) ka Balang da ka jingiaseng bad ka jingplie ia u mot sahkynmaw bad ka jingpyllait paidbah iaka souvenir jong ka Balang haka Sngi U Blei.

Kane ka jingrakhe iaka jingdap 125 snem ka Balang Presbyterian Nongsning kala sdang naduh 22 tarik Naitung 2022 bad la pynkut noh iaka hadpeng ka jingshongkun da ka jingshimbynta shongshit ki khun ka balang bad kiba shah khot sngewbha.

Ka matpdeng jong kane ka jingrakhe dap 125 snem kalong “Haduh ka jingthew ka rynieng ka jingdap U Khrist”  Shithi u Apostol Paul sha ki Ephesos 4:13.

Kum ka dak ka jingsngewnguh iaka jingialam U Blei ha kine ki 125 tylli ki snem, u Rev. EK Mujat ula plie ia u mot sah jingkynmaw, u Rev. M Shylla ula pyllait paidbah iaka Souvenir, katba ka Kong Silbarit Sympli ka la pynher iaki Ballon ryngkat ka jingsakhi lang ki riewngeit ka balang Presbyterian kiba najan bad najngai.

La pynshongshit shuh shuh iaka jingrakhe da ki jingrwai Choir kaba la shimbynta da ka Jingiaseng Kynthei, Jingiaseng Samla bad Jingiaseng Khynnah kumjuh ki jingrwai kyrpang. Hadien ka jingiaseng ladon ka jingot cake da u Pastor Rev. O Liting bad ban iadih sha sngewbha.

Katto katne ki history lyngkot ka Balang Presbyterian Nongsning. Ia kane ka Balang la sdang iaka ha u  snem 1898 da ki riew rangbah ka balang kiba la khlad noh. Katkum ka jingbuh jingthoh naka “Reports of the Foreign Mission of the Presbyterian Church of Wales on Khasi – Jaintia Hills (1864-1899)” ki iathuh ba ha ka por jong u Missionary W. M Jenkins, kane ka shnong/Balang Nongsning kaba don ha kane ka jaka mynta ka dei kaba lah pynkynkynriah thymmai da ki juh ki briew kiba juh shong juh sah sha kiwei pat ki jaka. Ka Balang Nongsning ka sdang nyngkong eh na ka shnong Dongtonglein kaba long ka shnong kaba heh bha bad kaba khambun briew ha ki “shnong Pohkhloo”.

U Khulu Malang uwei na ki Pnar ha ka thain Sutnga ula kylla Kristan da ka jingialap jong ki Missionary. Une u rangbah u la kylla long u shakri uba shitrhem bad ula leit ialap na kawei ka jaka sha kawei bad dei haka snem 1891. u Khulu Malang ula lah ban khring ia u Mon Bamon sha ka jingieid bah ka jong U Jisu Khrist. Kumta kane ka snem ka long kawei na ki snem ba kyrpang tam ia kaba kum ka Balang ka dei ban kynmaw ha ki pateng ki ban sa wan, namar ba u soh nyngkong ha ka jingngeit Khristan u mih ha kane ka snem. U Mon Bamon bad ka iing ka sem jong u baroh ki la long ki khristan kiba nyngkong eh ha ka history jong ka Balang Nongsning.

Ha ka jingiaid lynti kaba haduh hynniew (7) snem ei ei, la ioh ban thung Balang pura ia ka Balang Nongsning ha ka snem 1898. Katkum ka statistic jong ka District Shangpung kaba paw ha ka Report jong ka Foreign Mission of the Presbyterian Church of Wales on Khasi Jaintia Hills (1864-1899) ka jingbun briew ha kane ka snem ba la thung Balang ka long arphew wei (21) ngut.

Ka Balang kala sdang ban roi naduh ka snem 1898 haduh ka snem 1909, katba nangiaid ki sngi ki snem katta ruh ka jingroi jong ka Balang ka la nangkiew ha ki liang baroh khamtam eh ha ka jingngeit ia U Jisu. Kumta ki bor ba halor, kiba pyniaid ia ka Balang Presbyterian ki la i dei ban thung noh ia ka Balang Nongsning kum ka Centre Pastor jong ka Sub-District Narpuh baroh kawei.

Ka long jingkmen ba ka Balang Nongsning kan pynkha ia ki katto katne tylli ki Balang hapoh ki jingialam Tymmenbasan Mon Bamon, kita ki long ka Balang Deinlieh, ka Balang Bri Dkhar, Ka Balang Myrli bad kiwei de.

Ha u snem 2006 la khie ka revival, haka 10 tarik Nailur, kata 50 snem hadien jong u snem 1956 ha ka Balang Nongsning. Ha une u snem ka don ka jingjia kiba phylla kiba la pynkhih borbah U Blei bad kine ki soh jong ka revival ki neh sah haduh mynta.