La pynkyntang Lyngdoh Sohblei ia u Kyrshanbok Pohchen

Syllad | The Rising MeghalayaDecember 29, 2024

Ban pyniar ka jingshakri haka lyngkha baiar jong u Trai, ka St. Joseph Catholic Church, Nongtalang, Amlarem Parish kaba hap hapoh ka Jowai Diocese, kala pynkyntang lyngdoh sohblei ia u Dikon Kyrshanbok Pohchen CMF ha kaba iaka lehniam leh rukom la pyndep da u Most Rev. Ferdinand Dkhar, DD Bishop ka Jowai Diocese haka Mass Kyntang Lyngdoh kaba la long haka sngi u Blei.

Ha kane ka jingpynkyntang lyngdoh sohblei, la wan ban sakhi da ki hajar ngut ki paid riewngeit ka Balang Catholic bad kiwei ki para bangeit na ki balang bapher kumjuh ki nongmihkhmat paidbah.

U Lyngdoh Kyrshanbok u dei u phadar uba 9 bala sei ka Amlarem Parish bad uba lai na ka shnong Nongtalang.

Iaka Mass Bakhuid bad pynkyntang lyngdoh la lamkhmat da u Most Rev. Ferdinand Dkhar, DD Bishop ka Jowai Diocese haka jingsynran lang u Rev. Joseph Mappilaparambil, Provincial jong ka North East India Province ryngkat ki phadar, ki Lyngdoh sohblei napoh ka Diocese Jowai bad nabar.

U Most Rev. Ferdinand Dkhar, DD Bishop ka Jowai Diocese haka jingkren, ula ong u Dikon Kyrshanbok Pohchen CMF udei u soh jong ka jingiaid lynti jong ka balang shnong bad ki kmie ki kpa kiba la pynheh pynsan ia u. U dei ruh u soh jong ka jingtrei shitom kiba halor kiba la pynheh pynsan haki jinghikai ban pynkhreh ialade ban long uta u Lyngdoh.

U Bishop ula pynkynmaw ruh iaki para bangeit ba u Lyngdoh niam udei u briew uba la khot da U Blei bad shah pynkyntang ban shakri iaka balang bad u Khrist. Ka jingjied U Blei ia u Lyngdoh niam kamdei namar ba u long uba kham stad, uba tbit, uba tip lut bad bakhlain bor, hynrei U Blei u lah ruh ban jied wat ia kiba kham duna ka jingstad, kham duna ka bor ban long ki Lyngdoh niam ban shakri iaki paid bynriew jong ka balang.

Haba sneng bakraw iaki riewngeit u Bishop ula ong, ba kam pat biang ban kmen ban ioh ia u Lyngdoh hynrei donkam ka jingkyrshan lang jong ki para bangeit met bad mynsiem lyngba ki jingduwai bad ba un long uba pyndep hok iala ka kamram bad ka nuksa babha iaki briew baroh.

Haba iadei bad ki paid riewngeit, u Bishop ula kyntu ia baroh ki khun jong ka Balang ban im ka jingim kaba bha ka ban tei ia ka longiing longsem haka jingiaieid, jingiatylli hapdeng ka kmie, u kpa bad ki khun, hapoh ka Balang bad ha ka jaitbynriew hi baroh kawei.

Ula pyntip ruh ha une u snem ki Bishop hapoh ka ri India ryngkat ki lyngdoh, ki nongsharai balang bad ki riewngeit, ki thrang bad angnud ba ki iing ki sem jong ki para ba ngeit kan long kaba suk ba kmen, kaba koit bakhiah bad kaba khuid kum ka iing ka sem jong U Jisu, ka Maria bad Joseph.

Hadien ka Mass, la ioh ka jingkren bad ka jingkyrkhu da u Lyngdoh sohblei bathymmai Kyrshanbok Pohchen CMF, katba haka nohphai sngi la pynlong ia ka Iukharistic proseshon kaba la shim bynta da baroh ki para bangeit ryngkat ki jingrwai jingduwai ban iaroh ia U Blei ha baroh shilynter ka jingiaid proseshon.

Shwa kane u Rev. Joseph Mappilaparambil, Provincial jong ka North East India Province hadien ka Mass Bakhuid, ula pynbna ba la thung ia u Rev Fr. Kyrshanbok Pohchen CMF kum u Assistant Parish Priest ka Nonghalam Parish kaba hap hapoh ka Nongstoin Diocese.

Katto katne shaphang u Lyngdoh sohblei bathymmai Kyrshanbok Pohchen CMF udei u khun jong u Ma Stephan Bareh bad Kong Rita Pohchen naka Shnong Nongtalang. La kha ia u ha ka 28 tarik Rymphang 1996 ha Jowai. U dei u khun ba nyngkong na ki Hynriew ngut shipara (4 shynrang bad 2 khynthei).

Ka jingpule pynkhreh ban long ‘riewniam, ula pule Class XI bad XII, na St. Michael’s Higher Secondary School, Umsning (2013-2016), Bachelor of Philosophy (B.Ph), Claretian Ashram College of Philosophy, Wardha, Maharastra. Bad ka Bachelor of Arts (B. A), na New Arts, Commece and Science College, Wardah, Under Rajtrasan Tukodoji Maharaj Universty, Nagpur, Maharastra (2016-2019). Regency lane practical training kum u brother assistant ha Mary Queen of the Holy Rosary Church Dangar Parish, Shillong Diocese, (2019-2020).

Pre-Novitiate na St. Claret Nongmensong (2020). Novitiate na Claret Bhavan, Carmelaram Bangalore (2020-2021) bad la shim ia ka jingsmai ba nyngkong kum u riewniam ha ka 31.05.2021 ia kaba la pynsmai da I phadar Rev. Sabu Koottarappallil Cmf, Provincial jong ka Bangalore Province. Ka jingsmai ba khatduh ha Immaculate Heart of Mary Parish Mawpat, Shillong, ia kaba la pynsmai da u phadar Rev. Joseph Mappilaparambil, Provincial jong ka North East India Province. (31-05-2024). Bachelor of Thology (B. Th) na Oriens Theological Institutes, Mawlai, Shillong (2021-2024). U la shah pynkyntang Dikon ha ka 21 tarik Naitung, 2024 hapoh Oriens Theological Institutes, Mawlai da u Most Rev. Linus Neli, Archbishop jong ka Imphal Archdiocese. Deoconate Ministry ha Presentation Parish, Nonghyllam – Nongstoin Diocese.

U la jied ia ka ktien im sngi “Shwa ba yn kha ia phi Nga la pynkyntang ia phi” (Jeremiia 1:5).