La pynlong ia ka jingialap ban khanglad ia ka jingshah khaii beaiñ ki khunlung khynnah ha Khliehriat

Syllad | The Rising MeghalayaJune 13, 2024

Ka National Commission for Protection of Child Rights (NCPCR) ha ryngkat ka jingiatreilang bad ka State Commission for Protection of Child Rights (SCPCR) bad ki bor pyniaid District ka East Jaintia Hills ki la pynlong ka jingialap halor ki sienjam ba kongsan ban khanglad ia ki kam khaii beain ia ki khunlung khynnah ha ki 100 tylli ki jaka khappud bad ki district ba markhap jong ka ri India.

Ha kane ka jingialang ba la pynlong ha ka 12 tarik Jylliew hapoh Conference Hall jong u Deputy Commissioner, Khliehriat kaba la wan iashim bynta da ka Additional DC ka Kong JU Kharpuri ha ka jingiadon lang ka Assistant Commissioner, EJHD ka Kong F Wann, ki heh pulit, na ka Tnat Social Welfare, Health, Education, na ka Tnat Labour, ki dkhot ka Child Welfare Committee, EJH, ki nongialam shnong, Principal jong ki skul, ki nonghikai bad kiwei.

Ka ADC ka EJH ka Kong Kharpuri ha ka jingkren plie ia ka prokram ka la pynpaw halor ka jingkongsan jong ka mat kaba iadei bad ka jingiakhun pyrshah ia ki kam khaii beain ia ki khunlung khynnah, bad kaba donkam ruh ia ka jingphai khmat bad ka jingiatreilang hapdeng ki kynhun ba kongsan kaba kynthup naduh ka tnat pulit, ophisar sorkar, nongialam shnong, ki jaka pule bad kiwei pat ban khanglad ia kiba kum kine ki kam bymman ba shyrkhei.

Ka Resource Person jong ka prokram kaba dei ka Inspector na ka Tnat pulit ki kynthei ka Kong Opaia Tyngkan lyngba ka power point presentation ka la kdew halor ki hok bapher bapher jong ki khunlung khynnah kumba la kdew ha ka riti synshar khadar jong ka ri ne constitution.

Nalor kata ka la pynpaw ruh halor ki sienjam bapher bapher ki ban lah ban iakhun pyrshah ia kiba kum kine ki kam beain kaba kynthup lyngba ka Commissions for Protection of Child Rights Act, 2006, ka Protection of Children from Sexual Offences (POCSO)Act, 2012, Prohibition of Child Marriage Act, 2006, Child Labour (Prohibition and Regulation) Act, 1986, ka Juvenile Justice (Care and Protection of Children) Act, 2015 nalor kiwei pat ki kyndon ain.

Kumjuh ruh ka la batai bniah ha kaba iadei bad ki daw kiba lam sha ka jingshah khaii beain ki khunlung khynnah bad kdew ruh halor ka jingkiew sted jong kine ki kam beain kaba la don ruh ha ka kyrdan kaba lai hadien jong ki kam khaii drok bad ki kam khaii tiar siat beain.

Ka Kong Opaia Tyngkan ka la pynpaw ha ka jingialang halor ki lad jingujor ha kaba iadei bad kine ki kam beain pyrshah ia ki khunlung khynnah kumjuh ia ki lad jingiada ban lah ban khanglad ia kine ki kam bymman