La pynlong ia ka ‘Watershed Yatra’ ha Mawan ban kyntiew halor ka jinpynneh iaki tyllong um

Syllad | The Rising MeghalayaMarch 30, 2025

Ia ka Watershed Yatra ba la pynlong hapoh ka Pradhan Mantri Krishi Sinchayee Yojana (PMKSY) Watershed Development Component (WDC) 2.0, la pynlong ha ka 29 tarik Lber ha ka shnong Mawan, Mylliem C&RD Block, East Khasi Hills.

Ka jingthmu ba kongsan jong kane ka prokram ka long ban kyntiew ha kaba iadei ka rukom pyndonkam ia ka um bad ban pynneh ia ka khyndew bad pynshlur ia ka jingiashim bynta jong ki nongshong shnong ban pynneh pynsah ia ki tyllong um.

U Bah Hamletson Dohling nongaibuit jong u Myntri Rangbah ka Jylla ua la plie ia ka sem kaba mih ka umpohliew shibynta jong ka sienjam kaba kongsan ban pynneh pynsah ia ki tyllong um hapoh ka thain.

U Bah Hamletson u la kren ruh halor ka phang kaba iadei bad ka Watershed Programme bad ki jingmyntoi kiba lah ban ioh na ka da kaba pyntip ruh ba na ka liang ka sorka ka la trei shitom ban pyntreikam thikna ia kane ka project.

U la pynpaw ruh ba u don ia ka jingngeit ba lyngba kane ka prokram, yn lah ban pynshai sha ki paidbah halor ki sienjam ban iada ia ka mei mariang, bad u la kyntu ruh ia ka sorkar ba kan iatreilang ryngkat ryngkat bad baroh kiba don bynta khnang ban lah ban iada ia ka mariang bad ki jingdon jingem ki jong ka.

Kiwei pat kiba la ia donlang ha kane ka sngi ki kynthup ia u Bah Tosanbha Marwein u Block Development Officer ka Mylliem, u Bah WK Kharkongor u Divisional Soil & Water Conservation Officer ka Shillong Territorial Division, u Bah N Khongwir Senior AS&WC Officer jongka Shillong Territorial Division bad ki ophisar na kiwei kiwei ki tnad, ki nongmihkhmat na ki jaka pule bad ki khynnah pule.

Hadien, ki nongwan iashim bynta ki la iashim bynta shirthem ha ka jingthung ia ki tynrai dieng da kaba pyni ia ka jingangnud jong ki ban pynneh pynsah ia ka mariang bad la sam ruh ia ki syrnot kum ka jingai jingithuh sha kito kiba noh synniang ha kaban pynneh pynsah ia ki um ki wah bad ki tyllong um.

Ia kane ka Yatra la pynlong ruh ha North Garo Hills, East Garo Hills, West Garo Hills, South West Garo Hills, South Garo Hills, West Khasi Hills, Eastern West Khasi Hills, South West Khasi Hills bad East Khasi Hills, bad yn bteng ban pynlong ia kane sa hapoh West Jaintia Hills, East Jaintia Hills bad Ri Bhoi district.