La pynsangeh shwa ka jingai laisen thymmai ia ki winestore bad bonded warehouse: Kyrmen Shylla

Syllad | The Rising MeghalayaApril 2, 2025

U Myntri ka Tnad Excise u Bah Kyrmen Shylla ha ka 1 tarik Iaiong u pyntip ba ka Tnad ka la pynsangeh shipor ban ai laisen thymmai na ka bynta ban plie winestore bad bonded warehouse kat bym pat pyntreikam ia ka sienjam bathymmai ban pynbeit ryntih ia ka rukom ai laisen.

Haba kren sha ki lad pathai khubor, u Myntri u la ong, “Ngi la pynsangeh ban ai laisien ia mynta shipor. Ngin sa wanrah ia ka rukom treikam kaba thymmai. Ngin sa sdang biang ia ka jingai laisen tad hadien ba la pynlong ia ka jingbishar kaba bniah.”

 “Ki ophisar jong ngi ki la don hapdeng ka kam. Ngi la pynlong ia ka jingbishar bniah ban tip thikna hangno ngi donkam ban kyntiew ia ka jingdon jong ki wineshop ne dukan die kyiad bad hangno ngi donkam ban pynsangeh noh,” u la bynrap.

Katkum ka jingpynpaw ka jong u, ia kane ka rai la shim hadien ba la ioh pdiang ia ki jingujor na ki trai jong ki wineshop kiba la don lypa namar ba kim lah shuh ban pyniaid iew namar ka jingdon bun palat ki dukan die kyiad.

“Haba pynshong nongrim halor kine ki jingujor, ngi la pynsangeh shwa ban ai laisien thymmai. Ngin bishar bniah shwa bad tad hadien kata ngi la pyllait ia ki laisen thymmai. Lada ngi shem ba ki dukan kyiad ki duna bha ha kino kino ki jaka hynrei ka jingdie ka long kaba bun, ngi kwah ban ai laisen hynrei ngim lah pat ban shu ai beit beit lymda ki don ia ki kot ki sla kiba donkam,” u la ong.

Ha kaba iadei bad ki dukan kyiad hajan ki jaka pule puthi bad ki jaka mane Blei, u Myntri u la ong ba ka Tnad kan sa khmih halor kane ka bynta, hynrei kam shym la don satia ka jingai laisen thymmai.

U la ong ruh ba ia ki laisen la ai da kaba pynshong nongrim halor ka NOC ba la ai da ki Rangbah Shnong.

“Ngi burom ia ka jingsngew jong ki paidbah bad u Rangbah Shnong u dei u briew uba tip kham bha ia la ka jong ka shnong ka thaw bad u la shah jied da ki paidbah jong ka shnong. Kumta, ngi sngew ba ka long kaba donkam ban shim ia ka jingbit jong u khnang ba hadien habud lada jia ba mih kino kino ki jingpyrshah lane lada ki paidbah ki pynpaw pyrshah, ngi lah ban iakren abd ki Rangbah Shnong,” ong u Myntri.

Haba kylli, u Bah Kyrmen u la pynskhem ba ki dukan die kyiad kiba la don lypa kin dang iaid shakhmat bad kano kano ka jingpynkynriah kan long katkum ka jingkyrpad lyngba jong ki.