La pynskhem ia ka shnat ka Synjuk Ki Rangbah Kur ka Ri Bhoi District, kyntu pynneh ia ka jait Kmie

Syllad | The Rising MeghalayaJuly 21, 2024

Ka Seng Kmie jong ka Synjuk Ki Rangbah Kur Ka Bri U Hynñiewtrep ka la lah ban pynskhem ia ka shnat ha Ri Bhoi ha ka 20 tarik mynta u bnai ha iing dorbar Iewmulong, Marngar, Nongpoh.

Ha ka kylla step ka la don ka dorbar jong ka shnat Ri Bhoi ha ka ba la jied ia ki nongkitkam jong ka shnat ryngkat bad kiwei kiwei ki jingiatai ki ba iadei bad ki kam kur ha ki thaiñ Ri Bhoi.

La jied arngut ki nongkynpham jong ka shnat kaba kynthup ia u Bah Donbok Khymdeit bad Bah Ploster Syiem, bad la jied ia u Bah R Rang Kynsai Makdoh kum u Khlieh Rangbah, Bah Coming Marsing kum u Symbud Khlieh Rangbah, Bah Rudolf Born Makri kum u Saiñpyniar, arngut ki symbud Saiñpyniar, Bah Biolking Tmung bad Bah Biestar Sylliang bad Bah R. Brister Shadap kum u Batsaipan.                         

Kiwei kiwei ki longsan mansan ha ka kynhun nongkitkam ki long u Bah Phrangsngi Syngkli, Bah Nolkin Tron, Bah Bres Dorphang, Bah Mawshanlang Pamshong, Bah Treibor Nongrang, Bah Chesterfield Umbah, Bah Kwidersing Syiemlieh, Bah Thle Lyngdoh Myrdon, Bah Jrit Sohkktung, Bah Bris Kleiñ, Bah Joplin Tyngsang, Bah Twingstar Domblong, Bah Washington Shylla, Bah Joplin Sten, Bah Gershon Kynru, Bah Michael Binong, Bah Shanbor Sohkhwai, Bah Esli Phangcho, Bah Niren Pambah, Bah Nekshon Nongkoum, Bah Jeffrey Dorphang, Bah Ningstar Syntem, Bah Robert Narlong, bad Bah Babul Pator. Haduh ka khep ba la seng ia ka shnat Ri Bhoi la lah ban lum lang kumba laiphewsaw tylli ki kur ha ka thaiñ Ri Bhoi.

Ha ka por janmiet ka la don ka dorbar ba la ia shong lang bad ki rangbah kur na ka Seng Kmie ba la ialam da u Khlieh Rangbah ba shipor jong ka seng kmie u Bah R L Kharperan u ba la pynskhem artad ia ki nongkitkam jong ka shnat ka Synjuk Ki Rangbah Kur, Ri Bhoi bad la pynbud da ka jingkren na ki para rangbah kiba kynthup ia u Bah Erwin Khnong Syiem Sutnga, Sangot jong ka seng kmie, Bah R B Shadap, Bah D. Donstan Khonglah na ka shnat Jaintia, bad ki arngut ki nongkynpham na shnat Ri Bhoi, Bah Ploster Syiem bad Bah Donbok Khymdeit.

Nalor kata ka la don ka jingiatai bad ka jingai jingmut ryngkat bad ki jingpynsngew na ki para rangbah ki ba la poi sha ka Dorbar ban shim bynta bad synñiang la ki jingtip shaphang ki kur ha ka Bri U Hynñiewtrep.

Ka Seng Kmie jong ka Synjuk Ki Rangbah Kur ka skhem ha ka nongrim jong ka riti kheiñkur kheiñkha na ka kmie kumba la kubur ruh lyngba ki aiñ jong ka Dorbar Dalariti- Khasi Hills Autonomous District Council.

Hynrei ka la don ka jingkyntu na u Bah Ploster Syiem shaphang ki Karbi ki ba la byrshem lang ha ka imlang sahlang Khasi naduh mynnor ha ba la don ruh ka riti ban bujai blang ha Hima Shyllong, ka ba dang iai bteng haduh mynta mynne ha ka Riti Niam Pomblang Hima Khyrim.

Ki sohkyrdot ba la syrdoh ha ka jingiadei ka kur ka jait ha ki thaiñ Ri Bhoi la kyntu ruh ban bynrap ha ka Riti Synshar jong ka Synjuk, da ka ba pynshong nongrim ha ka dustur kheiñkur kheiñkha na ka kmie ka ban long salonsar ha ka jylla baroh kawei bad ika ban kdup ruh ia ki paradoh parasnam ha ki jylla ba marjan kum ha Assam bad kiwei kiwei ki thaiñ ba marjan, kynthup ruh ia kito kiba na shabar ri ha Bangladesh.