La pyrkhing ia ka kyndon 163 BNSS ha Wapungskur and Bataw hadien ba shah pynjulor ki EVM

Syllad | The Rising MeghalayaFebruary 21, 2025

Khnang ban khanglad na ka jinglah ban pynthud shuh shuh ia ka jinglong jingman ha ka shnong Bataw bad Wapungskur, East Jaintia Hills hadien ka jingjia shah pynjulor ki kor Electronic Voting Machine (EVMs) haka por ba dang iaid ka jingthep vote haka 21 tarik Rymphang, na ka liang u District Magistrate ka EJH u la pyntreikam pyrkhing mardor ia ka kyndon 163 BNSS ha baroh kine ki artylli ki shnong tad haduh ban da pynbna da kumwei pat.

Ka jingpyntreikam ia kane ka hukum ka long kaba kongsan ban tehlakam ia kino kino ki jingpynshong ban pynthud ia ka suk ka sain bad kaba lah ruh ban pynjur ia ka jingiakynad bad buh jingma ia ki mynsiem briew bad ia ki jingdon jingem.

Kane ka hukum ka khang pyrshah ban ialum lang palat ia ka san ngut briew ha ki bynta jong ka shnong Wapungskur bad Bataw lait noh ha ka Polling Station na ka bynta ka jingiathep vote. La khang pyrshah ruh ban rah ia kino kino ki tiar pynmynsaw ha ki bynta jong ka shnong Wapungskur bad Bataw lait noh tang ki bor pahara.

Kane ka hukum ka khang pyrshah ruh halor ki jingpyrshang jong kino kino ki briew ne kynhun ban pynthud ia ka jingiaid beit ha ka jingiathep vote bad ha ka leit ka wan jong ki briew lane ia kino kino ki jingpyrshang da ki reiw shimet ne kynhun ban pynthud ia ka suk ka sain.

Kane ka la wan long ruh hadien ba ka Tnad District Council Affairs (DCA) kala hukum ban pynlong biang da kawei ka jingiathep vote haka 22 tarik Rymphang naduh ka por 7 baje mynstep haduh 4 baje janmiet ha ki saw tylli ki polling station, ka Wapungskur A bad Wapungskur B hapoh Musniang-Rangad constituency bad Bataw A bad Bataw B ha Bataw-Lakadong constituency namar katei ka jingjia shah pynjulor bad thombor.