La rah iaka Torch Relay Meghalaya Games na Shillong sha Tura

Syllad | The Rising MeghalayaJanuary 10, 2024

U Myntri ka Tnat Sports and Youth Affairs ka sorkar jylla u Bah Shakliar Warjri haka 9 tarik Kyllalyngkot, u la kaweh ia ka lama na ka bynta ka Torch Relay Lane ka jingrah ia ka Dongmusa ka “5th Meghalaya Games” na madan SSA Stadium Shillong ia kaba yn pynkut ha sor Tura, West Garo Hills ka jaka ban pynlong ia kane ka lympung ialehkai ka ban sdang naduh ka 15 haduh ka 20 tarik Kyllalyngkot 2024.

Haba kren ha ka jingialang, une u Myntri u la pynpaw ia ka jingkmen ban ioh sdang ia kane ka Meghalaya Games da kaba thang ia ka Dongmusa bad ban aiti ia ki nongpyniaid. U la ong ba ka Meghalaya Games ka dei kawei na ki jingialehkai sports kaba heh tam ha ka jylla, bad u la ai ka jingkyrkhu kyrdoh ia baroh ki nongialehkai ki ban iashim bynta ha kane ka lympung.

“Ka sorkar ka kut jingmut skhem ban pynthikna halor ka jingseisoh jong kane ka lympung ialehkai ryngkat ka jingkyrmen ba kan dei kawei na ki lympung ialehkai kaba paka tam. Watla lyngba kane ka rynsan na ka liang ka Sorkar ka kyrmen ba ki nongiashim bynta ki lah ban ialehkai bha ha la ki jong ki discipline bapher bapher, ka sorkar ka khmih lynti ruh ba ha ki snem ki ban dang wan kin lah ruh ban leit iashim bynta ha ki rynsan iakob National level, International level kum ha ki Olympics,” ong u Myntri.

Nalor kata u la ban ruh ba ka jingangnud ba kongsan jong ka sorkar ka long ban pynioh ia ki rynsan ialehkai kiba biang tam na ka bynta ki nongialehkai bad ban pynshlur ia ki ban shim ia ka kam ialehkai sports kum ka thong jong ka jingim ha ka jaka jong ka jingialehkai myllen ne ba sngewtynnad.

U Myntri u la ban ruh halor ka bynta ba kongsan jong ka sports ban khanglad ia ki samla ba ngin lah ban kiar na u drok bad kiwei pat ki jingdih ba sniew. U la ong ruh ba ka Meghalaya Games nalor ka thong ban pynpaw ia ka mynsiem ialehkai, hynrei ka dei ruh ka rynsan kaba donkam tam na ka bynta ban pynkup bor ia ki samla ka jingplielad ha ki kam ki jam lyngba ki jingialehkai sports.