La rakhe ia ka “World Hepatitis Week 2024” ha Khliehriat, East Jaintia Hills

Syllad | The Rising MeghalayaJuly 24, 2024

Ia ka “World Hepatitis Week 2024” kaba ka matpdeng kalong “It’s time for Action” la rakhe ha ka 23 tarik Naitung ha ka prokram ba la pynlong hapoh Opioid Substitution Therapy (OST) Centre, East Jaintia Hills District, Khliehriat.

Ia kane ka prokram la khot pynlong da ka Ophis u District Medical & Health Officer, EJHD bad la wan iashim bynta da u District Medical & Health Officer, u Dr D Shylla ha ka jingiadon lang u Nodal Officer, Treatment Centre, National Viral Hepatitis Control Programme (NVCH), Khliehriat, Dr. D Nongpluh, Medical Officer incharge ka Opioid Substitution Therapy (OST) Centre, Khliehriat Dr. J Nongtdu, ki nongpang Hepatitis bad kiwei kiwei.

U DMHO, EJH u Dr D Shylla ha ka jingkren u la ong ba la rakhe ia ka “World Hepatitis Week” ha baroh kawei ka pyrthei ban pynshai sha ki paidbah ia ka jingsngewkhia halor kane ka jait jingshitom bad halor ki sienjam ha kaba ki briew kin lah ban shiim ia ki lynti ban iarap ban khanglad ia kane ka jait jingpang kaba ktah ia u dohnud ne Liver.

Nalor kata u la banjur ruh halor ka mat jong ka jingrakhe kaba long “It’s time for Action” da kaba kyntu ruh ia ka jingialang ban tip ia ka jinglong jingman jong ki ha kaba iadei bad ka jingpang Hepatitis da kaba phah leit test khnang ban iada ia lade na ka jingshah ktah ha u khniang jingpang hepatitis.

U Dr Shylla u la pynpaw ruh halor ki lad ban ioh ia ki injek bad ki dawai dashin ba la pynioh da ka sorkar na ka bynta kito ki briew kiba ioh ia kane ka jingpang.

Katba na kaliang u Nodal Officer, Treatment Centre, (NVCH), Khliehriat u Dr. D Nongpluh u la ai ia ka jingkren kaba bniah halor kumno kane ka jingpang hepatitis ka ioh lad ban rung ha u briew, kata da kaba kdew ruh halor ka jingktah jong u khniang jingpang hapoh ka met jong u briew khamtam ia u dohnud.

Katba na ka liang u Dr Nongpluh u la batai ruh halor kiba bun jait ki jingpang Hepatitis, ki dak ki shin jong kane ka jingshitom bad halor ki kyrdan bapher bapher jong kane ka jait jingshitom.

Ka jingrakhe ia ka “World Hepatitis Week” ha kylleng ka pyrthei ka plie ruh ia ki lad ki lynti na ka bynta ki kynhun ba iadon bynta ban shim ia ki sinjem ha ka jingiakhun pyrshah ia kane ka jingshitom.

Shuh shuh kiwei pat pat kiba la aijingkren ha kane ka prokram ki kynthup ia Medical Officer in-charge of Opioid Substitution Therapy (OST) Centre, Khliehriat, Dr J Nongtdu, Bah A Dhar, DPM, NHM bad P Lywait, PHN, NHM, Khliehriat.