La rakhe ïaka sngi ïap U Kiang Nangbah ha Chyrmang da ka Youth Conference

Syllad | The Rising MeghalayaDecember 29, 2019

JOWAI: Ka Lei Synshar Cultural Society kala rakhe ïaka lyngkhuh sngi ïap ba 157^th U Kiang Nangbah da ka Youth Conference haka shnong Chyrmang ha LP Skul jong ka Chyrmang Nein.

Kane ka Youth Conference ka dei kaba 25^th kaba la pynlong da ka Lei Synshar Cultural Society kaba la sdang haka 29 tarik kan kut lashai ka sngi 30 tarik Nohprah. Ki Samla na kylleng ki Raij, Seinraij kila wan ha kane ka conference ba kin ïoh ki jinghikai naduh ka longryngieng, ban hikai ïaki samla ban don ka mynsiem shlur bad ka jingïatylli hapdeng ki para samla kiba dei ki lawei jong ka Ri bad ka jaidbynriew.

Ha kane ka kynti la pynlong ïa kane ka conference da ka jingïatreilang jong ka Seinraiij Chyrmang. Ka phang pdeng jong kane ka jingïakynduhlang ki samla kadei “Tylli hei pyrkhat wabha, U Symbe im khuid im suba”

U Pa’iem Ainam Manik Syiem, Syiem ka Hima Mylliem ula wan ban plie ïa kane ka Youth Conference kaba la ju pynlong manla ka lyngkhuh sngi ïap u Kiang Nangbah bad u Tirot Sing ha rilum Khasi Jaiñtia.

U Pa’iem Ainam Manik Syiem haba kren ula ong ba U Kiang Nangbah u dei u riew shlur uba la ïakhun pyrshah bad ka sorkar phareng ban pynîoh laitluid ïa ngi. Ula ong ba ki samla mynta ki dei ban bud ïaka nuksa jong U Kiang Nangbah ban im haka lynti kaba hok bad ban synñiang sha ka imlang ka sahlang ban ïakhun pyrshah ïaka jingshah thombor jong ka jaidbynriew bad ban pynneh pynsah ïaka jinglong kyrpang ka jaidbynriew Hynniewtrep.

U Ma Puramon Kynjing Dolloi jong ka Elaka Jowai, uba long u nongaibuit kane ka society, ula ong ka Lei Synshar Cultural Society kaba hikai ban pynlut ka por khambun ha ka ban pynïoh jingnang jingstad ïaki khynnah bad samla, khamtam kiba wan na ki longïing ba duk kala lah ban phah skul bad kolej haduh 2000 ngut na Rilum Khasi Jaiñtia.

Ka Lei Synshar Cultural Society ka hikai ruh ïaki samla halor ka niam, ka riti ka dustur bad ai mynsiem ïaki samla ba kin long ki riew shlur ban ieng haka hok bad ban long ki myntoi jong ka imlang sahlang.

Haba kren halor ka lyngkhuh sngi ïap U Kiang Nangbah, U Dolloi ula ong ba U Kiang Nangbah ula len lade ïaka jingim ban ïakhun pyrshah ïa u dohlieh uba pyrshang ban thombor ïaka riti dustur bad ïaka niam ka rukom jong ka jaidbynriew.