La rejistar case ki Pulit pyrshah ia u DGP hadien ba shah ujor ejahar

Syllad | The Rising MeghalayaMay 10, 2024

Ka sorkar Jylla ka la bthah ia ka Tnat pulit ba kan rejistar case pyrshah ia u Director General of Police (DGP) ka Jylla u Lajja Ram Bishnoi u ban sa shongthait noh ha ka 19 tarik mynta u bnai hadien ka jingujor ejahar pyrshah ia u halor ka jingkynnoh pyndonkam beain da u nombor plate thok ia ka kali jong u.

Ia kane la pynpaw da u Symbud Myntri Rangbah ka Jylla uba khmih ia ka Tnat kam pohiing (Police) u Bah Prestone Tynsong ha ka 10 tarik Jymmang, da kaba ong ruh ba ka ain kan leh ia kaba donkam bad ba ka jingtohkit halor kane ka jingshah ujor ejahar ka la iaid shakhmat.

Haba kren sha ki lad pathai khubor u Bah Tynsong u la ong ruh, “Ngi la ioh pdiang ia ka ejahar ha ka janmiet jong ka 9 tarik mynta u bnai ha kaba iadei bad ka jingpyndonkam da u nombor plate thok. Kumta mynta la rejistar case bad ka jingtohkit ka la sdang mynta hi. Kumta ailad ba ka jingtohkit kan sdang bad ba ka ain kan leh hi ia kaba donkam.”

Lah ban kdew ba kane ka ejahar pyrshah ia une u DGP ka dei kaba la ujor da u heh pulit MPS barim uba bat ruh kum u Inspector General (AIG) u Bah GK Iangrai halor ka jingkynnoh ba une u hehduh pulit u la leh ia ka kam beain bad ka kam thok kam shukor da kaba pyndonkam da ka kali kaba la pyndait da u nombor plate thok.

Ha katei ka jingujor ejahar la kynnoh ba u DGP u la pyndonkam da kawei ka kali Kia Carnival Limousine kaba la pyndait beit ia u nombor ML02-A-0001, uba dei u nombor jong ka kali Verna bala thied da ka Tnat sorkar ia kaba la pynieng ha Central Workshop.

Haba kylli u Bah Prestone u la ong ruh, “Ia mynta hi ngam lah ban ong ei ei halor kane ka bynta namar shisien ba la ujor ejahar ngi hap ban shim kam bad ka jingtohkit ka dang shu sdang mynta.”

Nalor kata u la ong ruh ba wei la dep ban rejistar case bad hadien ba la pynlong ia ka jingtohkit ngi hap ban file da ka affidavit sha ka iingbishar halor ka kaiphot kaba bniah kaba mih na ka jingtohkit.Kumta ruh ngin sa ioh ia ka jingtip kaba pura lyngba ka rai jong ka iingbishar.