La sam iaki khusnam sha ki nongjop ha ka 49th Annual Cultural Competition ka Ramakrishna Mission

Syllad | The Rising MeghalayaAugust 5, 2023

Ia ka jingsam khusnam sha ki nongjop jong ka “49th Annual Cultural Competition 2023” la pynlong mynta ka sngi 5 tarik ha Ramakrishna Mission Vivekananda Cultural Centre, Quinton Road, Shillong, ha kaba la wan iashim bynta da ki khynnah na ki jaka pule bapher bapher na ka nongbah Shillong bad ki jaka ba marjan.

Ha kane ka sngi 246 ngut ki nongjop ha ki jingiakop bapher bapher naduh klas nursery hadud ki khynnah kolej ki la ioh ia ki buskit, ki certificate bad ki jingiaroh.

Ha kane ka prokram la ia don lang ruh ka Kong Rosetta Mary Kurbah, IAS, Deputy Commissioner ka East Khasi Hills, Shillong kum ka kongsan kaba la ai ka jingkitbok kitrwiang bad jingiaroh ia ki nongjop. Nalor kata ka la iaroh ruh ia ki sienjam jong ka Ramakrishna Mission kaba la pynlong ia kane ka jingiakop bad kyntu ia ki kmie ki kpa ba kin phikir ia ka koit ka khiah jong ki khun jong ki, khamtam kito kiba dang hapoh 5 snem ka rta.

Katba na ka liang ka Dr. Sabita Sen, Principal jong Shillong Commerce College ha ka jingkren kum ka Symbud Kongsan ka la ai mynsiem ia ki nongjop, khamtam kito kiba na ki secondary school ba kin pyntbit shuh shuh ialade. Ka la pynpaw ruh ka jingsngewnguh ia ka Ramakrishna Mission na ka bynta ki jingai jingshakri ia ka imlang sahlang.

Ha kane ka sngi ka la don ruh ka jingplie ia artylli ki website ba thymmai, kata ka rkmshillong.org bad ka vcc.rkmshillong.org bad la kyrmen skhem ba kine ki website kin ai jingtip shaphang ki kam ka Mission bad ki kam jong ka Vivekananda Cultural Centre.

Hashuwa kane, u Swami Divyaswarupananda Maharaj, Assistant Secretary ka Ramakrishna Mission, Shillong u la pdiang burom ia baroh kiba la wan iashim bynta ha kane ka sngi bad u Vairagya Chaitanya Maharaj u la pynpaw ka jingsngewnguh.

Ka 49th Annual Cultural Competition ka dei ka jingrakhe ia ka jingtbit, ka jingsaindur bad ka jingiatylli. Ka Ramakrishna Mission, Shillong, sa shisien ka la pyni ia ka jingkut jingmut jong ka ban ai rynsan ia ki briew ba don sap bad ruh ban pynneh ia ka deiriti jong kane ka thain. Kane ka prokram ka la ai mynsiem shibun ia kito kiba la wan iashim bynta ba kin kham pyntbit shuh shuh ialade bad ba kin don bynta ha ka jingkyntiew ia ka deiriti ha Shillong bad ha ki jaka ba marjan.