La sam M-Tab sha ki khynnah skul ka Block Mairang

Syllad | The Rising MeghalayaJuly 4, 2023

U MLA ka Mairang Bah Metbah Lyngdoh haka sngi ba ar ula sam iaki M-Tab sha ki khynnah skul kiba hap haka Mairang Block haka jingialang kaba long ha St. Thomas Higher Secondary School, Mairang.

Ia kane ka jingsam iaki M-Tab hapoh ka skhim Chief Minister’s Digital Learning Aid Scheme sha ki khynnah Class XI jong u snem 2022-2023 la pynlong da ka ophis ka Block Development Officer, Mairang C &RD Block, Mairang

U Bah Metbah uba long ruh u Chairman ka Meghalaya State Planning Board haba kren u la ong ba ki khynnah pule ki long ka lawei jong ka imlang sahlang bad kumta ki dei ban trei minot ban ia ryngkat bor bad ki khynnah pule na kiwei pat ki bynta jong ka pyrthei ha ka rukom pyndonkam ia ka jingstad teknoloji ha ka pule puthi kaba man ka sngi ka jong ki bad u la kyntu ruh ia baroh kiba ia sakhi lang ia kane ka prokram ba kin pdiang ia kiei kiei kiba bha ba ka bor teknoloji ka wanrah ha ka imlang sahlang .

U Bah Metbah u la ong ruh ba ka long ka kabu kaba khraw ia ki khynnah pule ba kin iohpdiang ia kiba kum kine ki lad jingiarap kiba ka sorkar ka ai khlem kano kano ka jingsiew pisa bad ha kane ka prokram, u Bah Metbah u la kren ruh shaphang ka jingkyrduh kam kyrduh jam kaba long kawei na ki mat kaba donkam bha ban iatai ha ka ri bad ka jylla bad ula kyntu ruh ia baroh ba kin ym khmih lynti tang ia ki kam sorkar hynrei ba kin thawlad ia kiwei pat ki rukom kamai jakpoh.

Ha ken ka jingsam ia kine ki M-Tab la iadonlang u Deputy Commissioner ka Eastern West Khasi Hills District, u Bah G. Kharmawphlang uba long kum u synbud kongsan, BDO  Mairang Block,Dr LR Hynniewta, u Sub- Divisional School Officer, Mairang, u Bah J. Thyrniang bad kiwei kiwei.