La sdang ïaka ‘Coaching Camp’ ka Jaiñtia Football Academy

Syllad | The Rising MeghalayaFebruary 4, 2019

JOWAI: Ka Jaiñtia Football Academy (JFA) kala plie ïaka ‘Coaching Camp’ haka sngi Saitjaiñ ban sdang noh ïaka jingai jinghikai ïaki khynnah kiba la dep ban pynrung kyrteng hapoh ka academy.

Ïa kane ka coaching camp la plie da u President ka JFA u ma Paul Synnah, uba long ruh u Engineer jong PHE (Electrical Division) haka jingïalang kaba long ha ïiungwalieh ka Dorbar Shnong Tpep Pale, Jowai.

U ma RD Syngkon, Secretary Dorbar Shnong Tpep Pale haba kren “Nga dei uwei na ki nongïalehkai phutbol, hynrei ngim ju ïoh ïa kum kine ki lad ai jinghikai pyntbit bad ka rukom ïalehkai haki por shuwa ba mynta kala pher bha. Ka rukom ïalehkai ki khynnah mynta kala itynnad bad phin ïohi ïa ki khynnah kiba ïalehkai hapoh Disrtict khamtam kito kiba la ioh jinghikai ka sur ialehkai kalong janai”.

“Ka jingsdang ïa kane shlem ai jinghikai kan long ka jingmyntoi kaba khraw ïaki khynnah ka District bad kyrmen baka JFA kan sei ki khynnah ïalehkai ba kynsai naduh dang rit”, la ong u Ma Syngkon bad ula ong shuh shuh ba “Ka kam ïalehkai kam dei shuh ka jingïalehkai ban pynbyrngia hynrei ka kharkhana kaba plie ïaki khynnah ki samla ba don sap ban ïoh kam ïohjam” la ong u ma RD Syngkon.

U Ma Paul Synnah, President ka JFA ula ong “Kane ka juk mynta; ka long ka juk jong kiba tbit la ha kano kano ka kam”, la ong u ma Paul bad bynrap ba ka jingnang jingstad ruh ka donkam, hynrei ym baroh ngim long ki doctor ki engineer, kumta ki kmie ki kpa dei ban pynshlur ïaki khun ki kti ban ïalehkai namar ba kadei kawei na ki lad ba lah ban ieng hala ki jong ki kjat.

Ki pleiar ba paw khmat haka pynthei u Messi, Ronaldo ruh ki ioh shuwa ka jinghikai bad ki sa long kumba long mynta bad ula wer ïaki kmie ki kpa ban phah ïaki khun jong ki ha kane ka shlem ba kin shah hikai ban saiñdur ïaka jingialehkai football jong ki.

Na kaliang u Ryum Khonglah, General Secretary JFA, ula ïathuh baka jingai jinghikai kan long ha madan Tpep Pale manla ka sngi Saitjaiñ haka por long skul, ha ki por shuti kan long ar lai sien shitaiew.

Ka JFA kila ki khot ki wer ïa ki khynnah kynthei kiba sngewtynnad ban ïalehkai football la na sor Jowai kumjuh ki shnong ba marjan ban wan sha kane jingai jinghikai ha kane ka aiom.

U JFA ka pynpaw ka jingsngew nguh ïaka Dorbar Shnong Tpep Pale bad ka Chutwakhu kiba la ai ïaka madan ïa ka JFA ban pynlong ïaki jingai jinghikai.