La sdang iaka jingai tika Pneumonia Conjugate Vaccine iaki khyllung ha Jowai

Syllad | The Rising MeghalayaJune 2, 2021

Ka tnad ka koit ka khiah jong ka West Jaintia Hills District lyngba ka National Health Mission (NHM) haka sngi Balang kala sdang ban ai tika Pneumonia Conjugate Vaccine (PCV) ia ki khyllung khynnah kaba naduh 1.5 bnai, 3.5 bnai bad 9 bnai ka rta.

Ia kane ka jingai tika ei la sdang na Chutwakhu Urban Primary Health Centre ha kaba u District Medical and Health Officer, West Jaintia Hills u Dr. KC Ajar ula long u kongsan haka jingiadonlang ka Additional District Medical & Health Officer ka Dr. B Challam kaba la pyllait paidbah ia kine ki tika, District Immunization Officer Dr. M Syngkon nalor kiwei kiwei.

Kane ka jingai tika iaki khyllung khynnah ka hap haka Universal Immunization Programme jong ka tnad ka koit ka khiah ban iada na ka jingpang Pneumococcal pneumonia bad ka Meningitis.

Kane ka jingai tika ka dei kaba la ai ei da ka sorkar ban iada iaki khyllung khynnah na kine ki jingpang kiba ma. U DMHO ula pyrshlur ia ki kmie ki kpa jong ki kyllung khynnah ban ai ia kane ka tika ha ki jaka sumar ba jan tam khnang ban ai jingiada iaki khyllung.