La sdang ka kam ban siang Artificial Turf ha 1st Ground Shillong

Syllad | The Rising MeghalayaOctober 27, 2022

U Bah Banteidor Lyngdoh Myntri ba dei khymih iaka tnat Sports & Youth Affairs ka sorkar jylla, u iathuh ba  na ka liang ka tnat ka la dep ha kaban aiti shi syndon da ka syrnot treikam ne ka work order ia u kontraktor uba la ioh naka bynta ban sdang ban pyntrei bnoh ia ka kam ban siang da u artificial turf ia ka madan ialehkai bnanam jong ka jylla, katta  First Ground, jong ka Shillong Sports Association.

Haba kren bad ki lad pathai khubor, na ka liang u bah Banteidor ula ong ba ka kam ruh ka la iaid ne ka la sdang bad ha ka juh ka por u pyntip ba kan da don ruh da ka prokram ban plie ia u mawnongrim jong kane ka kam, hynrei ban ioh ban pyndep noh pat ia ka kam haka por kaba la buh, da kumta ia mynta hi ka kam ka la sdang ba ka iaid shakhmat.

Haba kylli halor u turf ne u phlang plastic, u bah Banteidor u iathuh ba ia u turf u ban siang, ka sorkar kan nym ia pein da uwei u ar khlem da dei da u turf uba la pdiang ba dba la ioh ia ka jingithuh na ka FIFA.

Nalor ka madan, u bah Banteidor u iathuh  ba ka flood light ruh kan dei kawei pat  bynta jong ka kam ha kane ka madan bad dei namar kane, ba ka mang pisa halor kane ka madan ka kynjoh mynta sha ka 14 klur tyngka.

Haba batai shaphang ka daw ka jingbuh iaka flood light u bah Banteitor u pynpaw ba ka daw kaba la buh ia ka, ka dei namar ha kum kane ka juk bad ka por kaba mynta kiba bun hi ki briew kin nym lap ne don por ban hiar ban leit ban peitkai ia ka phutbol lada jia ba pynlong ia ki ha ka por 2 haduh 5 baje janmiet, namar ba ka dang dei ka por ba bun kam bha, da kumta, ban ailad ia ki paidbah bad ia ki nongtrei ophis ba kin ioh lem ia ka lad ban peitkai u, da kumta, la sngew donkam ban da pynieng bad ki floodlight khnang ba ia kino ma kino ki jingialehkai yn lah ban pynlong ha ka por janmiet.