La shah biang ban plie iew ha East Jaintia Hills

Syllad | The Rising MeghalayaJune 18, 2021

U District Magistrate, East Jaintia Hills District, Bah E Kharmalki haka sngi Thohdieng ula pynbna ba la ailad ban plie iaki iew lai sngi ha ka taiew ban wan haka sngi Nyngkong, Balang bad ka Sngi Thohdieng.

Kumban shu pynkynmaw ba dangshen haka 14 tarik une u bnai u district majistor ula hap ban pynkylla iaka hukum plie iew hadien ba ki dukan kila phiel ban bud ryntih iaki kyndon aiñ COVID-19

Kine ki iew kiba shah ban plie ki kynthup iaka Khliehriat East & West, baroh ka iew Ladrymbai, Umpleng, Chiehruphi, Lumshnong, Sohkymphor, Sookilo, Saipung, Samasi, Jalaphet, Rymbai, Wapung, Sutnga, Batwa and Umkiang bad ki dukan shnong kiba pyniaid da ki Dorbar Shnong ne Market Committee.

Ia kine ki iew la shah ban plie naduh ka por 9 baje mynstep haduh 3 baje nohphaisngi.

Shuh shuh tang 50 percent la shah ban plie iaki dukan mar bam, dukan electrical, dukan mobile, dukan die juti ban plie haka 21 tarik Jylliew kaba dei ka sngi Nyngkong.

50 percent la shah ban plie iaki dukan mar bam, hardware, spare parts dukan die jain haka 23 tarik Jylliew kaba dei ka sngi Balang.

Haka 25 tarik Jylliew kaba dei ka sngi Thohdieng la shah ban plie 50 percent iaki ki dukan die marbam bad ki electrical, Mobile bad dukan die Juti .

Shuh shuh ki dukan hapoh shnong kin plie naduh ka por 2 Pm haduh 6 pm.

Ka jingpyrkhing ban iaid ban ieng na kawei ka district sha kawei ka district ka dang neh bad kiwei kiwei ki jingpyrkhing kiba la dep pynbna nalor kiwei ki kam bala pyllait na ka kyndon pynjari ban tem iaka jingpur ka khlam COVID-19.